Anandaiah Medicine: కృష్ణపట్నం ఆనందయ్య మందు పంపిణీకి ఇటు ప్రభుత్వం, అటు హైకోర్టు నుండి గ్రీన్ సిగ్నల్ వచ్చిన సంగతి తెలిసిందే. ఈ నేపథ్యంలో ఆనందయ్య తయారు చేస్తున్న మందును తొలుత నెల్లూరు జిల్లా సర్వేపల్లి నియోజకవర్గంలో పంపిణీ చేయాలని నిర్ణయించుకుని ఆ మేరకు మందు తయారు జరుగుతోంది. మరో పక్క చిత్తూరు జిల్లా చంద్రగిరి ఎమ్మెల్యే చెవిరెడ్డి భాస్కరరెడ్డి ఆనందయ్య మందున నియోజకవర్గంలోని లక్షా 60వేల కుటుంబాలకు ఉచితంగా పంపిణీ చేయాలని నిర్ణయించుకున్నారు. ఆనందయ్య కుమారుడు శ్రీధర్, ఆయన శిష్యబృందం సహకారంతో పెద్ద ఎత్తున మందు తయారీని ఆదివారం ప్రారంభించారు. ఇప్పటికే ప్రజా భాగస్వామ్యంతో మందు తయారీకి అవసరమైన సహజ సిద్ధ వనమూలికలు, ఇతర వస్తువులను సిద్ధం చేశారు.
ఈ సందర్భంగా చెవిరెడ్డి మాట్లాడుతూ ఆనందయ్య మందును ప్రజలు విశ్వసిస్తున్నారన్నారు. కరోనా రాకుండా, శరీరంగా రోగ నిరోధక శక్త పెంచే విధంగా, బ్లాక్ ఫంగస్ వంటి వాటిని నియంత్రించే ప్రివెంటివ్ (పి) ను మాత్రమే తయారు చేస్తున్నట్లు తెలిపారు. నియోజకవర్గ పరిధిలోని లక్షా 60వేల కుటుంబాలలోని 5.20లశ్రల మంది ప్రజలకు ఉచితంగా ఆనందయ్య మందును అందించనున్నట్లు తెలిపారు. రెండు రోజుల్లో నియోజకవర్గ పరిధిలోని అన్ని గ్రామాల్లో మందు పంపిణీ జరుగుతుందన్నారు. సోమవారం సాయంత్రానికి మందు తయారీ పూర్తి అవుతుందని, మంగళవారం నుండి పంపిణీ ప్రారంభించే అవకాశం ఉందని భావిస్తున్నారు.
ఆనందయ్య కుమారుడు శ్రీధర్ ఈ సందర్భంగా కరోనా కట్టడికి ఉపయోగపడే సాంప్రదాయ మందు తయారీలో ఎమ్మెల్యే చెవిరెడ్డి భాస్కరరెడ్డి చూపిన చొరవ ప్రశంసనీయమన్నారు. వనమూలికల సేకరణ యజ్ఞంగా చేపట్టారని అన్నారు. నియోజకవర్గ ప్రజల కోసం చెవిరెడ్డిలా ఆలోచన చేసే నాయకులు లేరని అన్నారు. ఇతర ప్రజా ప్రతినిధులకు చెవిరెడ్డి ఆదర్శనీయంగా నిలుస్తారని పేర్కొన్నారు.
Read More: Dhulipalla Narendra: టీడీపీ మాజీ ఎమ్మెల్యే ధూళిపాళ్ళపై మరో కేసు నమోదు..! ఎందుకంటే..!
తొలి నుండి చంద్రగిరి నియోజకవర్గంలో కరోనా కట్టడి చర్యల్లో చెవిరెడ్డి భాస్కరరెడ్డి చేస్తున్న కార్యక్రమాలు ఆదర్శంగా నిలుస్తున్నాయి. దాదాపు రూ.25 లక్షలకుపైగా నిధులు వెచ్చించి ఆక్సిజన్ బెడ్లు సిద్దం చేశారు. భాధితులకు అవసరమైన మందులు అందించేందుకు నియోజకవర్గంలో ఏడు కోవిడ్ మెడికల్ షాపులను ఏర్పాటు చేశారు. అదే విధంగా ప్రత్యేకంగా ఏడు అంబులెన్స్ లు ఏర్పాటు చేశారు. కోవిడ్ కోఆర్డినేషన్ కమిటీ ఆధ్వర్యంలో నిర్ణయాలు తీసుకుంటూ బాధితులకు మెరుగైన వైద్య సేవలు అందిస్తున్నారు. నియోజకవర్గంలోని ప్రతి ఇంటికి పది మాస్కులు చొప్పున ఉచితంగా పంపిణీ చేశారు. ఇప్పుడు తాజాగా ఆనందయ్య మందు పంపిణీకి చెవిరెడ్డి చర్యలు చేపట్టారు.
