కేరళలో ఏపి అయ్యప్ప భక్తుల బస్సు బోల్తా .. ప్రమాదంపై సీఎం వైఎస్ జగన్ ఆరా

కేరళలో ఏపి అయ్యప్ప దీక్ష స్వాములు ప్రయాణిస్తున్న బస్సు ఘోర ప్రమాదానికి గురైంది. ఏపిలోని ఏలూరు జిల్లాకు చెందిన అయ్యప్ప భక్తులు ప్రైవేటు టూరిస్ట్ బస్సులో శబరిమల శ్రీ అయ్యప్ప స్వామి దర్శనానికి వెళ్లారు. వీరు తిరుగు ప్రయాణంలో ఉండగా, పతనంథిట్ట జిల్లా లాహల్యాంప్ బోటు ప్రాంతం బస్సు అదుపుతప్పి పల్టీ కొట్టింది. ఈ ప్రమాదంలో 15 మందికిపైగా గాయపడ్డారు. వీరిలో నలుగురి పరిస్థితి విషమంగా ఉన్నట్లు తెలుస్తొంది. సమాచారం అందిన వెంటనే పోలీసులు అక్కడకు చేరుకుని గాయపడిన వారిని పత్తనంథిట్ట ఆసుపత్రికి తరలించారు. ప్రమాదం జరిగిన సమయంలో 40 మంది యాత్రికులు ఉన్నారు. క్షతగాత్రులు ఏలూరు మండలం మాడేపల్లి ప్రాంతానికి చెందిన వారుగా గుర్తించారు.

బస్సు బ్రేక్ డౌన్ అవ్వడం వల్ల ఈ ప్రమాదం జరిగిందని భావిస్తున్నారు. ప్రమాద సమాచారం తెలియడంతో దీక్షా స్వాముల కుటుంబ సభ్యులు ఆందోళన చెందుతున్నారు. ఈ ఘటనపై అక్కడి జిల్లా కలెక్టర్, అధికారులతో ఏలూరు జిల్లా కలెక్టర్ ప్రసన్న వెంకటేశ్ ఫోన్ లో మాట్లాడారు. గాయపడిన వారి వివరాలు, క్షేమంగా బయటపడిన వివరాలను తెలుసుకున్నారు. బస్సు ప్రమాద ఘటనపై ఏపి సీఎం జగన్ దిగ్భాంతి వ్యక్తం చేశారు. బస్సు ప్రమాదంపై సీఎం జగన్ ఆరా తీశారు. అధికారులను వివరాలు అడిగి తెలుసుకున్నారు. గాయపడిన వారికి మెరుగైన వైద్యం అందించేలా చర్యలు తీసుకోవాలని ఆదేశించారు.

#RoadAccident #ayyappa devotees bus at #SabarimalaTemple @AndhraPradeshCM @SRKRSajjala @CMOKerala pic.twitter.com/u2S4ZOVBIP

— netaji (@NetajiNtv) November 19, 2022

sharma somaraju Content Editor

See Full Bio