AP EX DGP: ఉమ్మడి ఆంధ్రప్రదేశ్ లో డీజీపీగా బాధ్యతలు నిర్వహించిన సీనియర్ ఐపీఎస్ అధికారి బి ప్రసాదరావు నేటి తెల్లవారుజామున గుండెపోటుతో కన్నుమూశారు. ప్రస్తుతం అమెరికాలో ఉంటున్న ఆయనకు ఛాతి నొప్పి రావడంతో కుటుంబ సభ్యులు అంబులెన్స్ లో ఆసుపత్రికి తరలించారు. చికిత్స అందించే లోపుగానే ఆయన తుదిశ్వాస విడిచారు.
1979వ బ్యాచ్ ఐపీఎస్ అధికారి అయిన ప్రసాదరావు స్వస్థలం విజయవాడ. యన కరీంనగర్, నల్లగొండ, నిజామాబాద్ ఎస్పీగా, ఎసీబీ డీఐజీగా, హైదరాబాద్, సైబరాబాద్ కమిషనర్ గా బాధ్యతలు నిర్వహించడంతో పాటు ఏపిఎస్ ఆర్ టీసీ ఎండీగానూ పని చేశారు. ఆయన సేవలకు గుర్తుగా 1997లో ఇండియన్ పోలీస్ మెడల్, 2006లో రాష్ట్రపతి పోలీస్ పతకాలను అందుకున్నారు. డీజీపీ దినేష్ రెడ్డి పదవీ తర్వాత 2013 లో ఇన్చార్జి డీజీపీగా బాధ్యతలు నిర్వహించారు. ప్రసాదరావు మృతి పట్ల ఏపి సీఎం వైఎస్ జగన్మోహనరెడ్డి సంతాపం తెలియజేశారు. ఆయన కుటుంబ సభ్యులకు ప్రగాఢ సానుభూతి తెలియజేశారు.