ఆ కేసులు అన్నీ సీఐడి నుండి సిట్ కు బదిలీ..! ప్రభుత్వ కీలక ఉత్తర్వులు..!!

రాష్ట్రంలో దేవాలయాలపై దాడులు, విగ్రహాల ధ్వంసం ఘటనలను ప్రభుత్వం సీరియస్ గా తీసుకున్న విషయం తెలిసిందే. విజయనగరం జిల్లా రామతీర్థంలో కోదండ రాముడి విగ్రహా ద్వంసం ఘటనతో సహా రాష్ట్రంలో పలు ఆలయాల ఘటనలు రాష్ట్రంలో తీవ్ర దుమారాన్ని రేపుతున్నాయి. ఈ నేపథ్యంలో ప్రభుత్వం వీటికి సంబంధించి కీలక ఆదేశాలు జారీ చేసింది. ఇంతకు ముందు ఘటనలపై సీఐడి దర్యాప్తునకు ఆదేశాలు జారీ చేసిన రాష్ట్ర ప్రభుత్వం ఇప్పుడు తాజాగా 16 మంది పోలీస్ అధికారులతో సిట్ ఏర్పాటు చేసింది. సిఐడీ నుండి సీట్ కు విచారణను బదిలీ చేస్తూ ప్రభుత్వం ఉత్తరులు ఇచ్చింది.

ఏసిబీ అడిషనల్ డైరెక్టర్ గా బాధ్యతలు నిర్వహిస్తున్న ఐపీఎస్ అధికారి జివిజి అశోక్ కుమార్ నేతృత్వంలో ఏర్పాటైన సిట్ బృందంలో కృష్ణాజిల్లా ఎస్పీ రవీంద్ర నాధ్ బాబు, అడిషనల్ ఎస్పీలు ఎస్ శ్రీధర్, ఎల్వీ శ్రీనివాసరావులతో పాటు ఇద్దరు డీఎస్పీలు, ఇద్దరు ఎసీపీలు, నలుగురు సీఐలు, నలుగురు ఎస్ఐలు ఉన్నారు. ఆలయాలపై దాడులకు సంబంధించి అన్ని కేసులను సిట్ విచారించనున్నది. ఆలయాలపై జరుగుతున్న దాడుల కలకలం నేపథ్యంలో రాష్ట్ర ప్రభుత్వం రాష్ట్ర, జిల్లా స్థాయి అధికారులతో మతసామరమస్య కమిటీలను ఏర్పాటు చేస్తూ ఉత్తర్వులు జారీ చేసిన విషయంత తెలిసిందే.