AP High Court: వైసీపీ ఎంపి రఘురామ కృష్ణంరాజుపై ఏపీ సీఐడి నమోదు చేసిన కేసులో రాజద్రోహం (సెక్షన్ 124ఏ) మినహా ఇతర సెక్షన్‌ల విషయంలో దర్యాప్తు కొనసాగించుకోవచ్చనీ, దర్యాప్తునకు రఘురామ కృష్ణంరాజు సహకరించాల్సిందేననీ హైకోర్టు స్పష్టం చేసింది. అయితే విచారణ పేరుతో పిలిచి సీఐడీ హాని తలపెట్టే అవకాశం ఉందని ఆయన ఆందోళన వ్యక్తం చేస్తున్న నేపథ్యంలో హైదరాబాద్ లోని దిల్‌కుషా ప్రభుత్వ అతిధి గృహంలో ఆయనను విచారించేందుకు సీఐడీకి అనుమతి ఇచ్చింది హైకోర్టు. పిటిషనర్ ఎంచుకున్న న్యాయవాది సమక్షంలో ఉదయం 10 గంటల నుండి సాయంత్రం 5 గంటల వరకు మాత్రమే విచారించాలనీ, విచారణ ప్రక్రియను వీడియో గ్రఫీ చేయాలనీ తెలిపింది.
- Read the latest news in Telugu from AP and Telangana’s most trusted news website.
- Follow us on facebook , Twitter , instagram and Googlenews
పిటిషనర్ హార్ట్ పేషంట్ అయినందున దర్యాప్తు సమయంలో తగిన జాగ్రత్తలు తీసుకోవాలనీ, ఆయన భద్రతా సిబ్బందిని విచారణ చేసే గది బయట వరకూ అనుమతించాలని దర్యాప్తు అధికారులకు ఆదేశించింది. కేసుకు సంబంధించిన అంశాలు తప్ప ఇతర విషయాల గురించి ప్రశ్నించడానికి వీల్లేదని చెప్పింది. పిటిషనర్ ఎఫ్ఐఆర్ నమోదునే సవాల్ చేసినందన ఈ కేసు దర్యాప్తు ముగిసినప్పటికీ చార్జిషీటు దాఖలు చేయవద్దని దర్యాప్తు అధికారులను ఆదేశించింది. ఈ కేసులో ఏబీఎన్, టీవీ 5 యాజమాన్యం కూడా నిందితులుగా ఉన్నారు.
కేసు దర్యాప్తు లో భాగంగా ఇతర నిందితులతో కలిపి రఘురామ కృష్ణంరాజును ప్రశ్నించాలని సీఐడీ భావిస్తే కనీసం 15 రోజుల ముందు నోటీసులు ఇవ్వాలని తెలిపింది. కోర్టు ఆదేశాలను ఉల్లంఘిస్తే తీవ్రంగా పరిగణిస్తామనీ, సంబంధిత అధికారులు చట్టపరంగా చర్యలు ఎదుర్కోవలసి ఉంటుందని హెచ్చరించింది. తదుపరి విచారణను ఆగస్టు 24కి వాయిదా వేసింది. ఈ మేరకు న్యాయమూర్తి జస్టిస్ మానవేంద్రనాథ్ రాయ్ బుధవారం మథ్యంతర ఉత్తర్వులు జారీ చేశారు.
