AP High Court : ఏపి పౌరసరఫరాల శాఖ మంత్రి కొడాలి నాని kodali nani హైకోర్టులో ఊరట లభించింది. మీడియాతో మంత్రి కొడాలి నాని మాట్లాడవచ్చని హైకోర్టు మద్యంతర ఉత్తర్వులు జారీ చేసింది. ఈ నెల 21వ తేదీ పంచాయతీ ఎన్నికలు ముగిసే వరకూ మీడియాతో మంత్రి కొడాలి నాని మాట్లాడకూడదంటూ ఎస్ఈసీ ఇచ్చిన ఆంక్షలను హైకోర్టు ఎత్తివేసింది. అయితే ఎన్నికల కమిషన్, ఎన్నికల కమిషనర్, ఎన్నికల ప్రక్రియకు విఘాతం కలిగే విధంగా కొడాలి నాని మాట్లాడకూడదని హైకోర్టు సూచించింది. మీడియాతో మాట్లాడే సమయంలో సంయమనం పాటించాలని పేర్కొంది.
ఎస్ఈసీ ఇంతకు ముందు మంత్రి పెద్దిరెడ్డి రామంద్రారెడ్డి, పెడన వైసీపీ ఎమ్మెల్యే జోగి రమేష్ విషయంలో తీరుకున్న చర్యలను హైకోర్టు కొట్టివేసిన విషయం తెలిసిందే. ఇప్పుడు తాజాగా మంత్రి కొడాలి నాని విషయంలో తీసుకున్న చర్యలపైనా ఎస్ఈసీకి హైకోర్టు షక్ ఇచ్చింది.
ఇటీవల మంత్రి కొడాలి నాని మీడియా సమావేశంలో టీడీపీ అధినేత చంద్రబాబు, తెలుగుదేశం పార్టీని తీవ్ర స్థాయిలో విమర్శిస్తూ ఎస్ఈసీ నిమ్మగడ్డ రమేష్ కుమార్ పైనా తీవ్ర వ్యాఖ్యలు చేశారు. దీనిపై మంత్రి కొడాలి నానికి ఎస్ఈసీ షోకాజ్ నోటీసు జారీ చేసింది. దీనిపై న్యాయవాది ద్వారా ఎస్ఈసీకి మంత్రి నాని వివరణ ఇచ్చారు. అయితే వివరణపై సంతృప్తి చెందని ఎస్ఈసీ పంచాయతీ ఎన్నికలు ముగిసే వరకూ (ఈ నెల 21వ తేదీ) మీడియాతో మాట్లాడకూడదంటూ ఆదేశాలు జారీ చేసింది. ఎస్ఈసీ ఉత్తర్వులపై మంత్రి కొడాలి నాని హైకోర్టును ఆశ్రయించగా విచారణ జరిపింది. ఇరుపక్షాల న్యాయవాదులు సమర్పించిన మంత్రి మీడియా సమావేశం వీడియోలను హైకోర్టు పరిశీలించింది. నిన్న విచారణ సందర్భంలో పిటిషన్ పై మధ్యేమార్గంగా తగిన ఉత్తర్వులు జారీ చేస్తామని హైకోర్టు తెలిపింది. ఈ మేరకు గురువారం ఉత్తర్వులు జారీ చేసింది.
