Municipal Elections : రాష్ట్రంలో మున్సిపల్ ఎన్నికలను ప్రధాన రాజకీయ పార్టీలు ప్రతిష్టాత్మకంగా తీసుకున్నాయి. గ్రామ పంచాయతీ ఎన్నికల్లో మెజార్టీ వాటా కైవశం చేసుకున్న వైసీపీ YCP అదే దూకుడుతో మున్సిపల్ ఎన్నికల్లో ఫలితాలు రాబట్టుకునేందుకు సర్వశక్తులు ఒడ్డుతోంది. దీంతో రాష్ట్రంలో రాజకీయ వాతావరణం హీట్ ఎక్కింది. అధికార పార్టీ ఎత్తులకు టీడీపీ TDP బేజారెత్తిపోతుంది. మెజార్టీ స్థానాలు ఏకగ్రీవం చేసుకునేందుకు వైసీపీ YCP పావులు కదుపుతోంది. ఏకంగా టీడీపీ TDP అభ్యర్థులే వైసీపీ YCP గూటికి చేరి పార్టీ కండువాలు కప్పేసుకుంటున్నారు.
చివరి నిమిషంలో అభ్యర్థులు టీడీపీ TDP ని వదిలి వైసీపీలోకి జంప్ చేస్తున్నారు. దీంతో అభ్యర్థులను కాపాడుకోవడానికి టీడీపీ TDP నానా తంటాలు పడుతోంది. సాధారణంగా ఎన్నికల తరువాత చైర్మన్ ఎన్నికల సమయంలో కౌన్సిలర్, కార్పోరేటర్‌ లను ఆయా పార్టీలు క్యాంపులకు తరలిస్తుంటాయి. కానీ ఇప్పుడే టీడీపీ TDP అభ్యర్థులను కాపాడుకునేందుకు క్యాంపుకు తరలించినట్లు వార్తలు వస్తున్నాయి. బుధవారం సాయంత్రం ఉపసంహరణ గడువు ముగిసే వరకూ అభ్యర్థులను కాపాడుకోవాల్సిన పరిస్థితి టీడీపీకి ఏర్పడింది. చిత్తూరు, అనంతపురం జిల్లాలోని టీడీపీ అభ్యర్థులను బెంగళూరు తదితర ప్రాంతాల క్యాంపులకు పంపినట్లు తెలుస్తోంది.
కర్నూలు జిల్లా ఆత్మకూరు మున్సిపాలిటీలో 24 వార్డులు ఉండగా రెండు వార్డుల్లో టీడీపీ అసలు నామినేషన్లు వేయలేదు. మిగిలిన 22 మంది అభ్యర్థుల్లో 18 మంది వైసీపీ కండువా కప్పుకున్నారు. దీంతో 20 వార్డుల్లో టీడీపీ అభ్యర్థులే లేనట్లైంది. శ్రీకాకుళం జిల్లా పలసాలో నలుగురు టీడీపీ అభ్యర్థులు వైసీపీ కండువా కప్పేసుకున్నారు. ఇలా చెప్పుకుంటూ పోతే ప్రతి జిల్లాలోనూ టీడీపీ అభ్యర్థులు వివిధ కారణాలతో పార్టీ జంప్ అవుతున్నారు. నేటి సాయంత్రం నామినేషన్ల ఉపసంహరణ గడువు పూర్తి అయిన తరువాత రాష్ట్ర వ్యాప్తంగా ఎన్ని వార్డులు ఏకగ్రీవం అయ్యాయనేది స్పష్టం అవుతుంది.
