YSRCP : ఆంధ్ర ప్రదేశ్ అధికార పార్టీలో కొత్త తన్నులాట తెరమీదకు వస్తోంది. ఈసారి బూడిద కోసం ఒకే పార్టీలోని రెండు గ్రూపుల మధ్య ఏర్పడిన వివాదం చినికి చినికి గాలివానగా మారుతోంది. బూడిద తమకు కావాలంటే తమకు కావాలని రెండు వర్గాలు పట్టుదలతో ఉండడంతో ఈ పంచాయతీ తాడేపల్లి కు చేరింది.
విజయవాడ సమీపంలోని ఇబ్రహీంపట్నంలో నార్ల తాతారావు విద్యుత్ థర్మల్ కేంద్రం ఉంది. సుమారు 1800 మెగావాట్ల సామర్థ్యం ఉన్న ఈ ప్లాంట్ నుంచి రోజుకు మూడు టన్నుల పైగా బూడిద బయటకు వస్తుంది. బొగ్గు ద్వారా నడిచే ధర్మల్ విద్యుత్ కేంద్రం కావడంతో బొగ్గును కాల్చడం ద్వారా దానిని వేడి చేసి, ఓ పద్ధతి ప్రకారం విద్యుత్ను ఉత్పత్తి చేస్తారు. బొగ్గు మండించడం తర్వాత వచ్చే బూడిదను చెరువు లాంటి ప్రత్యేకమైన పెద్ద గుంత తీసి దానిలో వేస్తారు. ఇది రోజుకు టన్నుల మేర బయటకు వస్తుంది. దీనినే ఫ్లై యాష్ గా పిలుస్తారు.
** గతంలో ఈ బూడిద గాలికి ఎగిరి చుట్టుపక్కల గ్రామాల్లో పడేది. కాస్త గాలి వచ్చినా సరే చుట్టుపక్కల గ్రామాలన్ని బూడిదతో నిండిపోయేవి. అయితే కాలక్రమేణా ఈ బూడిదకు డిమాండ్ ఏర్పడింది. ఈ ఫ్లై యాష్ తో ఇటికలు తయారు చేయడంతో పాటు రోడ్ల నిర్మాణానికి, ఇతర నిర్మాణాలకు ఎక్కువగా వాడుతుండటంతో ఈ బూడిద మార్కెట్లో ఇప్పుడు సిరులు కురిపిస్తోంది. ఇబ్రహీంపట్నం ఎన్టీపీసీ నుంచి వచ్చే బూడిద కోసం, దానిని దక్కించుకునేందుకు అధికార పార్టీలో ఇప్పుడు రెండు వర్గాల మధ్య విపరీతమైన ఆధిపత్య ప్రదర్శనా కొనసాగుతోంది.
** గతంలో ఈ బూడిద దక్కించుకునేందుకు టెండర్ నిర్వహించేవారు. అయితే దీనిని దక్కించుకోవడం కోసం అధికార పార్టీలో విజయవాడ వేదికగా రాజకీయాలు సాగుతున్నాయి. ఒక వర్గం జగన్ దగ్గర బంధువు మంత్రి అయిన ప్రకాశం జిల్లా నేత బాలినేని శ్రీనివాస రావు పేరును ఉపయోగించుకుంటే, మరో వర్గం ధర్మ కేంద్రం పరిధిలో ఉన్న మైలవరం ఎమ్మెల్యే వసంత కృష్ణ ప్రసాద్ పేరును ఉపయోగించుకుంటున్నారు.
** రెండు వర్గాలు బలమైన నేతలకు అనుచరులు కావడంతోపాటు వారి బంధువులు గా చలామణి అవుతూ బూడిద కోసం పోటీ పడడంతో ఈ వివాదం సీఎం ఆఫీస్ వరకు వెళ్లినట్లు తెలుస్తోంది. బాలినేని శ్రీనివాస్ రావు తో పాటు, వసంత కృష్ణ ప్రసాద్ లతో తాడేపల్లి పెద్దలు ఫోన్ లో మాట్లాడే వివాదాన్ని సెటిల్ చేసే దిశగా ఆలోచిస్తున్నట్లు తెలుస్తోంది. అయితే రెండు వర్గాల్లోని నాయకులు సైతం దీనిమీద పట్టుదలగా ఉండటంతోపాటు, దీని కోసం ఎంత వరకు వెళ్లడానికి నా సిద్ధంగా ఉండటంతో ఏం చేయాలో తెలియని పరిస్థితిలో బూడిద పంచాయితీ కనిపిస్తోంది.