Pet Dog Birthday: చాలా మంది వారి ఇళ్లలో పెంపుడు జంతువులను చాలా ప్రేమగా చూసుకుంటుంటారు. ఖరీదైన శునకాలను పెంచుకుంటుంటారు. అవి వారి కుటుంబంతో ఎంతో ప్రేమగా ఉంటుంటాయి. వాటి మెయింటనెన్స్ కు ఖర్చు బాగానే చేస్తుంటారు. బలమైన ఆహారాన్ని వాటికి పెడుతుంటారు. రక్తసంభందీకులు కన్నా పెంపుడు జంతువులు చాలా విశ్వాసపాత్రంగా ఉంటాయని అనేక సందర్భాల్లో రుజువు అయ్యింది. అయితే ఇక్కడ చెప్పుకునే విషయం ఏమిటంటే కర్నూలు జిల్లాలో ఓ వ్యక్తి తన పెంపుకు కుక్క (శునకానికి) ఘనంగా బర్త్ డే నిర్వహించడం గ్రామస్తులను విశేషంగా ఆకట్టుకుంది.
కర్నూలు జిల్లా బండి ఆత్మకూరు మండలం సింగవరం గ్రామానికి చెందిన ఉండే వెంకట సుబ్బయ్య గౌడ్ కు సంతానం లేదు. ఆయన ఆవు దూడలు, ఓ శునకాన్ని పెంచుకుంటున్నాడు. ఇటీవల తన పెంపుడు శునకానికి ఘనంగా పుట్టిన రోజు వేడుకను నిర్వహించారు. ఇది ఆయన ఇంట్లో కుటుంబ సభ్యుల మధ్య జరుపుకుంటే ఎవరికీ తెలిసేది కాదు. కానీ ఆయన ఇరుగు పొరుగు వారిని, పరిచయస్తులను పిలిచి మరీ ఘనంగా శునకానికి భర్త్ డే వేడుకలను నిర్వహించారు. అందరి సమక్షంలో కేక్ ను కట్ చేసి..పంచి పెట్టారు. తన శునకానికి ఇది రెండవ జన్మదినం అని వెంకట సుబ్బయ్య తెలిపారు.
వెంకట సుబ్బయ్య గతంలో ఆయన పెంచుకుంటున్న ఆవుదూడకు మూడు సార్లు జన్మదిన వేడుకలను ఘనంగా నిర్వహించారని స్థానికులు చెబుతున్నారు. పెంపుడు శునకానికి ఈ విధంగా ఘనంగా పుట్టిన రోజు వేడుక నిర్వహించడం తనకు చాలా ఆనందంగా ఉందని వెంకట సుబ్బయ్య పేర్కొంటున్నారు. ఇది గ్రామంలో హాట్ టాపిక్ గా మారింది. గ్రామస్తులు ఈ విషయాన్ని ఆసక్తిగా చర్చించుకుంటున్నారు. పట్టణ ప్రాంతాల్లో ఇటువంటివి గతం నుండి జరగడం సహజమే అయినా గ్రామీణ ప్రాంతంలో ఈ విధంగా పెంపుడు జంతువులకు పుట్టిన రోజు వేడుక నిర్వహించడంపై ఆశ్చర్యాన్ని వ్యక్తం చేస్తున్నారు.