CM YS Jagan: ఏపీ సీఎం వైఎస్ జగన్‌తో ఫ్లిప్ కార్ట్ సీఈఓ భేటీ..! ఈ కీలక అంశాలపై చర్చ..!!

CM YS Jagan: ప్రముఖ ఈ – కామర్స్ సంస్థ ఫ్లిప్‌కార్ట్ సీఈఓ కళ్యాణ్ కృష్ణమూర్తి, కంపెనీ ఉన్నతాధికారుల బృందం గురువారం ముఖ్యమంత్రి వైఎస్ జగన్మోహనరెడ్డితో భేటీ అయ్యింది. ఈ సందర్భంగా పలు కీలక అంశాలపై చర్చలు జరిగాయి. ప్రధానంగా రాష్ట్రంలో పెట్టుబడులు, వ్యాపార అవకాశాలు, రైతుల వ్యవసాయ ఉత్పత్తులకు మంచి ధరలు అందేలా చూడటం, నైపుణ్యాభివృద్ధి అంశాలపై విస్తృతంగా చర్చించారు. ఈ సందర్భంగా వ్యవసాయ రంగంలో తీసుకువచ్చిన విప్లవాత్మకమైన మార్పులను ఫ్లిప్‌కార్టు సీఈఓ కృష్ణమూర్తికి సీఎం వివరించారు. రైతాంగానికి విత్తనం అందించడం మొదలు కొని వారి పంటలు కొనుగోలు వరకూ ఆర్బీకేలు కీలకంగా నిలుస్తున్నాయని చెప్పారు. రైతుల వ్యవసాయ ఉత్పత్తులకు మంచి ధరలు వచ్చేలా ఫ్లిక్ కార్టు దోహదపడాలని సీఎం కోరారు. వారి ఉత్పత్తులను కొనుగోలు చేసి వినియోగదారులకు అందించే కార్యక్రమంలో ఫ్లిప్ కార్టు భాగస్వాములు కావాలనీ, మంచి టెక్నాలజీని అందుబాటులోకి తీసుకురావడంలో సహయపడాలనీ కోరారు.

ప్పటికే ఎప్పటికప్పుడు ధరల పర్యవేక్షణకు యాప్ ఉందనీ, దాన్ని మరింత మెరుగుపరిచేందుకు తగిన తోడ్పాటు అందించాలని సీఎం జగన్ విజ్ఞప్తి చేశారు.  తాము విస్తృతపరుస్తున్న సరుకుల వ్యాపారంలో రైతుల నుండి ఉత్పత్తులు కొనుగోలు చేసేందుకు తగిన చర్యలు తీసుకుంటామని సీఎం జగన్ కు ఫ్లిప్ కార్టు సీఈఓ తెలిపారు. ఇది తమ సంస్థకు, రైతులకు ప్రయోజనం కల్గిస్తుందనీ, మంచి టెక్నాలజీ అందించేలా తమ వంతు కృషి చేస్తామని చెప్పారు. విశాఖపట్నం ఐటీ, ఈ – కామర్స్ పెట్టుబడులకు మంచి వేదిక అని, అక్కడ మరిన్ని పెట్టుబడులకు ముందుకు రావాలని సీఎం పిలుపుఇచ్చారు. నైపుణ్యాల మెరుగుపరచడానికి విశాఖలో హై ఎండ్ స్కిల్ యూనివర్శిటీని ఏర్పాటు చేస్తున్నామనీ,  ఇందులో భాగస్వాములు కావాలని సీఎం కోరారు. సీఎం ప్రతిపాదనపై ఫ్లిప్ కార్ట్ సీఈఓ కృష్ణమూర్తి సానుకూలంగా స్పందించారు. ఇప్పటికే విశాఖలో తమ సంస్థ వ్యాపారాలు చురుగ్గా సాగుతున్నాయనీ, మరిన్ని పెట్టుబడులు పెడతామని పేర్కొన్నారు. నైపుణ్యాభివృద్ధి కార్యక్రమాల్లోనూ భాగస్వాములు అవుతామని వెల్లడించారు.