బంగాళాఖాతంలో ఏర్పడిన ఉపరితల ఆవర్తన ప్రభావం కొనసాగుతోంది. దీని ప్రభావంతో రానున్న మూడు రోజుల్లో ఏపి, తెలంగాణలో భారీ నుండి అతి భారీ వర్షాలు కురుస్తాయని వాతావరణ కేంద్రం హెచ్చరించింది. ఏపి తీరంలోని పశ్చిమ మద్య బంగాళాఖాతంలో ఉపరితల ఆవర్తనం స్థిరంగా కొనసాగుతోందని తెలిపింది. ప్రస్తుతం సముద్ర మట్టానికి 5.8 కిలో మీటర్ల ఎత్తు వరకూ ఈ ఆవర్తనం విస్తరించి ఉందనీ, నైరుతి దిశగా పయనిస్తోందని హైదరాబాద్ వాతావరణ శాఖ పేర్కొంది. ఇక శుక్రవారం పశ్చిమ మద్య బంగాళాఖాతం మీదుగా ఏపీ తీరం నుండి కొనసాగుతున్న ధ్రోణి నేడు బలహీనపడింది. రానున్న 24 గంటల్లో ఈశాన్య, దాని పరివసరాల్లోని తూర్పు మద్య బంగాళాఖాతంలో మరో ఆవర్తనం ఏర్పడే అవకాశం ఉందని వీటి ప్రభావంతో ఏపిలో భారీ నుండి అతి భారీ వర్షాలు పడనున్నట్లు వాతావరణ శాఖ తెలిపింది. అలాగే తెలంగాణలో అక్కడక్కడా తేలికపాటి నుండి ఓ మోస్తరు వర్షాలు పడే అవకాశం ఉన్నట్లు పేర్కొంది.
ఇప్పటికే కోస్తాంధ్రలో అక్కడక్కడ భారీ నుండి అతి భారీ వర్షాలు పడుతుండగా, తీరం వెంబటి గంటకు 40 నుండి 45 కిలో మీటర్ల వేగంతో ఈదురుగాలులు వీస్తున్నాయి. శనివారం మధ్యాహ్నం నుండి రాత్రి వరకూ ఏపిలోని పలు ప్రాంతాల్లో ఉరుములు, మెరుపులతో కూడిన భారీ వర్షం కురిసింది. ఏపి తీరంలోని పశ్చిమ మద్య బంగాళాఖాతంలో ఉపరితల ఆవర్తనం కేంద్రీకృతమై ఉండటంతో దాని ప్రభావం ఏపిపైనే అధికంగా ఉంటుందని వాతావరణ శాఖ తెలిపింది. మత్స్యకారులు చేపల వేటకు వెళ్లొద్దని విశాఖ, అమరావతి వాతావరణ శాఖ అధికారులు హెచ్చరిస్తున్నారు.
