విశాఖలో ఉద్రిక్తత కొనసాగుతోంది. నిన్న విశాఖ విమానాశ్రయం వద్ద జరిగిన ఘటనలపై పోలీసులు కేసు నమోదు చేశారు. ఎయిర్ పోర్టు వద్ద మంత్రులు ఆర్కే రోజా, జోగి రమేష్, వైసీపీ కీలక నేత వైవీ సుబ్బారెడ్డి కార్లపై జనసేన శ్రేణులు దాడులు చేయడంపై హత్య యత్నంతో సహా పలు సెక్షన్ ల కింద కేసులు నమోదు చేశారు. సీసీ టీవీ పుటేజీ ద్వారా కొందరు జనసేన నేతలను గుర్తించిన పోలీసులు అరెస్టు చేశారు. పవన్ కళ్యాణ్ బస చేసిన నోవాటెల్ హోటల్ వద్ద అర్ధరాత్రి అరెస్టులు చేసిన నేపథ్యంలో ఉద్రిక్త పరిస్థితులు నెలకొన్నాయి. పోలీసులు భారీగా మోహరించారు. జనసేన నేతల అరెస్టుపై పవన్ కళ్యాణ్ స్పందిస్తూ ట్వీట్ చేశారు. విశాఖ పోలీసుల దురుసు ప్రవర్తన చాలా దురదృష్టకరమని, జనసేన ఎప్పుడూ పోలీసులను గౌరవిస్తుందని పేర్కొన్నారు. జనసేన నేతలను అరెస్టు చేయడం దారుణమని ట్వీట్ చేశారు. డీజీపీ జోక్యం చేసుకుని అరెస్టు చేసిన నేతలను వెంటనే విడుదల చేయాలని లేకుంటే తానే పోలీస్ స్టేషన్ కు వచ్చి తమ నేతలకు సంఘీభావం తెలుపుతామని ప్రకటించారు. దీంతో పోలీసులు అప్రమత్తమై నోవాటెల్ వద్ద భారీ బందోబస్తు ఏర్పాట్లపై చర్చించారు.
మరో పక్క పవన్ కళ్యాణ్ జనసేన జనవాణి కార్యక్రమం నిర్వహించే విశాఖ పోర్టు కళావాణి స్టేడియం వద్ద ఉత్తరాంధ్ర జేఏసీ ఆధ్వర్యంలో పెద్ద సంఖ్యలో మహిళలు, వైసీపీ శ్రేణులు చేరుకుని నిరసన కార్యక్రమం చేపట్టారు. గోబ్యాక్ పవన్ కళ్యాణ్ అంటూ నినాదాలు చేస్తూ ఆందోళన చేపట్టారు. అక్కడ ఆందోళన చేస్తున్న వారిని పోలీసులు అదుపులోకి తీసుకున్నారు. నోవాటెల్ హోటల్ వద్ద నుండి కళావాణి స్టేడియం వద్దకు పవన్ కళ్యాణ్ భారీ ఊరేగింపుగా వెళ్లాలని భావిస్తుండగా, పోలీసు అధికారులు పవన్ కళ్యాణ్ తో చర్చలు జరిపారు. నేరుగా జనవాణి కార్యక్రమంలో పాల్గొనాలని సూచించినట్లు తెలుస్తొంది. నోవాటెల్ హోటల్ వద్ద చేరుకుంటున్న జనసేన శ్రేణులను పోలీసులు నిలువరించారు. పవన్ ను అరెస్టు చేసినట్లు వస్తున్న వార్తల్లో నిజం లేదని పోలీసులు తెలిపారు. అయితే జనవాణి కార్యక్రమాన్ని తాము అడ్డుకుంటామని ఉత్తరాంధ్ర జేఏసి ప్రకటించడంతో విశాఖలో హైటెన్షన్ వాతావరణం నెలకొంది. ఉత్తరాంధ్ర జేఏసి ఆధ్వర్యంలో వైసీపీ శ్రేణుల ఆందోళన నేపథ్యంలో శాంతి భద్రతల సమస్య తలెత్తే అవకాశం ఉన్నందున జనవాణి కార్యక్రమాన్ని వాయిదా వేసుకోవాలని పోలీసు అధికారులు సూచించినట్లు తెలుస్తొంది. అయితే జనవాణి రద్దు చేసే అలోచన లేదని పవన్ కళ్యాణ్ స్పష్టం చేసినట్లు సమాచారం. విశాఖలో ఉద్రిక్త పరిస్థితుల నేపథ్యంలో జనవాణిపై సందిగ్ధత కొనసాగుతోంది.
