Pawan Kalyan Vs Ambati Rambau: ఒకప్పుడు బడిలో పంతులు (మాస్టారు) సరిగా చదవని విద్యార్ధులను వెధవ అని లేదా గాడిద, అడ్డ గాడిద అంటూ తిట్టేవాళ్లు, విద్యార్ధులు ఒకరి నొకరు పొట్లాడుకునే సమయంలో పంది, దున్నపోతు అంటూ పశువుల పేర్లతో తిట్టుకునే వాళ్లు. కానీ ఇప్పుడు ఆ భాష రాజకీయ నేతలు ఉపయోగిస్తున్నారు. ఇప్పుడు పాఠశాలల్లో ఇంగ్లీషు మీడియం లో విద్యాబోధన జరుగుతుండటంతో సరిగా చదవని, సక్రమంగా తరగతులకు రాని విద్యార్ధులను, మంచి మార్కులు రాని వారిని బ్లడీ ఫూల్, ఈడియట్ అంటూ ఇంగ్లీషులో తిడుతున్నారు. అయితే పాత కాలం నాటి పశువుల తిట్లను ఇప్పుడు రాజకీయ నేతలు ఉపయోగిస్తుండటం జరుగుతోంది.
Pawan Kalyan: జనసేన అధినేత పవన్ కళ్యాణ్ సంచలన కామెంట్స్
గతంలో రాజకీయ నేతలు ప్రత్యర్ధి నాయకులపై విమర్శలను హుందాగా చేస్తుండేవారు. వారు అదే రీతిలో ప్రతి విమర్శలు చేస్తుండే వారు. కానీ ఇప్పుడు రోజులు మారాయి. ఇప్పుడు మీడియాలో రాయలేని భాషలో దుర్భాషలు, బూతులతో ప్రత్యర్ధులను తిట్టే పరిస్థితులు కొనసాగుతున్నాయి. మీడియాలో కూడా గతంలో రాయలేని దూషణలను ఇప్పుడు రాస్తున్నారు. తాజాగా జనసేన అధినేత పవన్ కళ్యాణ్ వైసీపీలో తనను విమర్శించే నాయకులను ఉద్దేశించి ఆ గాడిదలు ఓండ్రిస్తున్నాయి అంటూ సీరియస్ కామెంట్స్ చేశారు. గతంలో రాజకీయ నాయకులు ఒక వేళ పరుష పదజాలంతో ఏవరినైనా విమర్శిస్తే ప్రత్యర్ధి నాయకుడు హుందాగా ఆ వ్యాఖ్యలు ఆయన విజ్ఞతకే వదిలివేస్తున్నాను అంటూ కూడా ఆ వివాదాన్ని అక్కడితో నిలుపుదల చేసే వాళ్లు.
ఇప్పుడు పవన్ కళ్యాణ్ వైసీపీలోని కొందరు నాయకులను గాడిదలుగా పోలుస్తూ విమర్శిస్తే మంత్రి అంబటి రాంబాబు అదే రీతిలో ప్రతి విమర్శలు చేశారు. వరాహం అని పెద్ద అడ్డ గాడిద అంటూ అంబటి రాంబాబు కౌంటర్ కామెంట్స్ చేశారు. ప్రత్యర్ధులను ఈ రకంగా తిట్లతో దూషణలు చేస్తే ఆ పార్టీ నాయకులు, అభిమానులు చప్పట్లు కొట్టి సంతోషిస్తారేమో కానీ సాధారణ ప్రజానీకం మాత్రం ఇదేమి భాషరో బాబో అని అనుకుంటారు. ఇంతకు ముందు రాజకీయ నాయకుల మధ్య బూతుల పంచాంగం ఉండేది కాదు. కానీ ఇప్పుడు ప్రత్యర్ధులను బూతులతో తిట్టడం ఫ్యాషన్ అయిపోయింది. దీంతో ప్రత్యర్ధులు కూడా తామేమి తక్కువ తిన్నామా మాకు బూతులు వచ్చు అంటూ అదే రీతిలో కౌంటర్ అటాక్ లు ఇస్తున్నారు. కానీ ఇటువంటివి ఎంకరేజ్ చేయడం మంచిది కాదని రాజకీయ నేతలు తెలుసుకుంటే మంచిది.
పవన్ కళ్యాణ్ వ్యాఖ్యలకు మంత్రి అంబటి రాంబాబు రియాక్షన్ ఇది