IPS ABV Letter To AP CS: సీనియర్ ఐపీఎస్ అధికారి ఏబీ వెంకటేశ్వరరావు తన సస్పెన్షన్ అంశంపై ఏపి ప్రభుత్వ ప్రధాన కార్యదర్శి (సీఎస్) సమీర్ శర్మకు లేఖ రాశారు. తనను ఇంకా సస్పెన్షన్ లో కొనసాగించే అధికారం రాష్ట్ర ప్రభుత్వానికి లేదని అన్నారు. రెండేళ్లు పూర్తి అయినందున సస్పెన్షన్ తొలగిపోయినట్లేనని ఏబీ వెంకటేశ్వరరావు పేర్కొన్నారు. సస్పెన్షన్ ఆరేసి నెలల చొప్పున పొడిగింపు జనవరి 27తో ముగిసిందని, రెండేళ్లకు మించి సస్పెన్షన్ కు కేంద్ర హోంశాఖ అనుమతి తప్పని సరి అని లేఖలో ఏబీ వెంకటేశ్వరరావు పేర్కొన్నారు. గడువులోపు కేంద్ర హోంశాఖ నుండి అనుమతి తీసుకోనందున అది ముగిసినట్లేనని అన్నారు. సస్పెన్షన్ తొలగిపోయినందున సర్వీస్ రూల్స్ ప్రకారం తనకు పూర్తి జీతం ఇవ్వాలని ఏబీ వెంకటేశ్వరరావు లేఖలో కోరారు.
ఏబీ వెంకటేశ్వరరావు గత చంద్రబాబు ప్రభుత్వంలో ఇంటిలిజెన్స్ చీఫ్ గా పని చేసిన సంగతి తెలిసిందే. వైసీపీ ప్రభుత్వం అధికారంలోకి వచ్చిన తరువాత వివిధ అభియోగాలపై ఆయనను సస్పెండ్ చేయడం జరిగింది. ఆ తరువాత ఆయనపై ఎఫ్ఐఆర్ కూడా నమోదు అయ్యింది. అయితే దీనిపై ఆయన హైకోర్టు ఆశ్రయించడంతో అరెస్టు నుండి మినహాయింపు లభించింది. ఏబీ వెంకటేశ్వరరావుపై గతంలో వైసీపీ నేతలు అనేక ఆరోపణలు చేశారు. తొలుత ఆయన సస్పెన్షన్ పై హైకోర్టును ఆశ్రయించగా తిరిగి విధుల్లోకి తీసుకోవాలని తీర్పు ఇచ్చింది. హైకోర్టు తీర్పుపై రాష్ట్ర ప్రభుత్వం ఉన్నత కోర్టులో సవాల్ చేసింది.
