Janasena Tdp Alliance: రాష్ట్రంలో మరో ఏడాది ఎన్నికలు జరగనున్న నేపథ్యంలో రాజకీయ పొత్తులకు సంబంధించి క్లారిటీ వచ్చేస్తొంది. జనసేన – టీడీపీ పొత్తుతో పోటీ చేస్తాయంటూ గత కొంత కాలంగా వార్తలు వస్తున్నా ఆయా పార్టీల అధినేతలు నిన్న మున్నటి వరకూ క్లారిటీ ఇవ్వకపోవడంతో కొంత సందిగ్దత నెలకొంది. కానీ జనసేన అధినేత పవన్ కళ్యాణ్ పొత్తులపైనా, సీఎం పదవిపై ఒక క్లారిటీ ఇచ్చేయడంతో సస్పెన్స్ కు తెరపడినట్లు అయ్యింది. టీడీపీ – జనసేన కూటమిలో బీజేపీ చేరుతుందా లేదా అనేది మరి కొద్ది రోజుల్లో తెలుస్తుంది. టీడీపీతో కలిసేందుకు బీజేపీ అగ్రనాయకత్వం సుముఖంగా లేనట్లు స్పష్టమవుతోంది. ఆ విషయం పవన్ మాటల్లోనే వ్యక్తం అయ్యింది. బీజేపీని కూడా పొత్తుకు ఒప్పించే ప్రయత్నం చేస్తానని పవన్ కళ్యాణ్ పరోక్షంగా పేర్కొనడంతో ఆ పార్టీ సుముఖంగా లేదు అన్నది అర్ధం అవుతోంది. రాష్ట్రంలో రాజకీయ పరిస్థితులపై కేంద్ర బీజేపీ పెద్దలతో మాట్లాడినట్లుగా పవన్ కళ్యాణ్ చెప్పుకొచ్చారు.
జనసేన – టీడీపీ పొత్తు ఖాయమన్నట్లు సంకేతాలు రావడంతో జనసేన ఏయే పోటీ చేస్తుంది, ఎన్ని సీట్లు అడిగే అవకాశం ఉంది.. టీడీపీ ఎన్ని సీట్లు ఇవ్వడానికి సిద్దం అవుతుంది అనే అంశాలపై రాజకీయ వర్గాల్లో చర్చ జరుగుతోంది. తమ పార్టీ బలంగా ఉన్న నియోజకవర్గాల్లో ఖచ్చితంగా పోటీ చేస్తామని పవన్ కళ్యాణ్ స్పష్టం చేయడంతో.. ఏయే నియోజకవర్గాల్లో జనసేన బలంగా ఉంది అని లెక్కలు వేస్తున్నారు. 2019 ఎన్నికల్లో జనసేన పార్టీ 130కిపైగా నియోజకవర్గాల్లో పోటీ చేయగా, దాదాపు 35 నియోజకవర్గాల్లో గెలుపు ఓటములను ప్రభావితం చేసింది. దీంతో ఆయా నియోజకవర్గాల్లో అంటే 10 నుండి 20 శాతంకు పైగా ఓట్లు సాధించిన వాటిని జనసేన అడిగే అవకాశం ఉంది.
ఏయే నియోజకవర్గాల్లో జనసేనకు 10 శాతంపైగా ఓట్లు వచ్చాయనేది ఒక పరిశీలన చేస్తే.. గాజువాక, కాకినాడ రూరల్, అమలాపురం, రాజోలు, పాలకొల్లు, రాజమండ్రి రూరల్, భీమవరం, తాడేపల్లిగూడెం, నర్సాపురం, పెద్దాపురం, కాకినాడ సిటీ, ముమ్మడివరం, కొత్తపేట, మండపేట, ఫిఠాపురం, తణుకు, పెడన, ఆవనిగడ్డ, విజయవాడ ఈస్ట్, విజయవాడ వెస్ట్, గుంటూరు వెస్ట్, భీమిలి. విశాఖపట్నం ఈస్ట్, విశాఖపట్నం సౌత్, విశాఖపట్నం నార్త్, యలమంచిలి, రామచంద్రాపురం, రాజనగరం, రాజమండ్రి సిటీ, నిడదవోలు, ఆచంట, ఏలూరు, మచిలీపట్నం, ప్రత్తిపాడు (గుంటూరు) నియోజకవర్గాల్లో పది నుండి 20 శాతంకుపైగా జనసేనకు ఓట్లు వచ్చాయి.
ఈ నియోజకవర్గాల్లో మెజార్టీ స్థానాలను పొత్తులో భాగంగా జనసేన అడిగే అవకాశాలు ఉన్నాయి. ఇవి కాకుండా ప్రతి జిల్లాలోనూ ఒకటి రెండు స్థానాలు పొత్తులో భాగంగా తీసుకునే అవకాశాలు ఉన్నాయని అంటున్నారు. అయితే టీడీపీకి బలమైన నాయకత్వం, ఓటు బ్యాంక్ ఉన్న నియోజకవర్గాల విషయంలోనే జనసేన – టీడీపీ మధ్య కొంత ఇబ్బందికర పరిస్థితులు ఎదురయ్యే అవకాశాలు ఉన్నాయనీ, వాటిని ఏ విధంగా సాల్వ్ చేసుకుంటారనేది చూడాలి.
YS Viveka Case: వివేకా హత్య కేసులో లేఖపై సీబీఐ కీలక నిర్ణయం