L.Ramana: తెలంగాణలో ఓ వెలుగు వెలిగి ఇప్పుడు కనుమరుగు అయిపోయిన తెలుగుదేశం పార్టీలో మిగిలిన ఒకరో ఇద్దరో నేతలు ఆ పార్టీకి గుడ్ బై చెప్పే పరిస్థితులు కనిపిస్తున్నాయి. క్యాడర్ లేని తెలుగుదేశం పార్టీకి లీడర్ వలే నిలిచి తెలంగాణలో ఉనికిని కాపాడిన తెలంగాణ టీడీపీ రాష్ట్ర అధ్యక్షుడు ఎల్.రమణ ఆ పార్టీకి రాజీనామా చేయబోతున్నారని సమాచారం. ఈ మేరకు ఆయన అధికార టీఆర్ఎస్ పార్టీతో డీల్ కుదుర్చుకున్నారని తెలుస్తోంది.
తెలంగాణ టీడీపీ.. అతడే ఒక సైన్యం….
క్యాడర్ లేని టీడీపీ ని అతే ఒకసైన్యం వలే ఎల్.రమణ నడిపించారు. అడపాదడపా కార్యక్రమాలతో ఆ పార్టీ అనుకూల మీడియాలో నిలిపారు. అయితే, తెలుగుదేశం పార్టీకి భవిష్యత్ కరువవడం, ఇటీవల జరిగిన ఎమ్మెల్సీ ఎన్నికల్లో స్వయంగా తాను పోటీ చేసిన దారుణ ఓటమి మూటగట్టుకున్న నేపథ్యంలో ఎల్ . రమణ తన పొలిటికల్ జర్నీ గురించి ఆలోచనలో పడ్డట్లు తెలుస్తోంది. ఇదే సమయంలో పార్టీలో మళ్లీ చేరికల ఊపు తేవాలని భావిస్తున్న టీఆర్ఎస్ ఆయనపై ఫోకస్ పెట్టినట్లు సమాచారం.
ఎల్ రమణకు ఏ పదవి ఇస్తున్నారంటే…
రాజకీయంగా తెలుగుదేశం పార్టీ లో భవిష్యత్తు లేదనే విషయం స్పష్టమైన నేపథ్యంలో రమణపై టీఆర్ఎస్ దృష్టి సారించింది. ఈ మేరకు మంత్రి ఎర్రబెల్లి దయాకర్ రావును రంగంలోకి దింపింది. తెలుగుదేశం పార్టీలో ఉన్న దోస్తానతో ఎర్రబెల్లి దయాకర్ రావు ఆయనతో చర్చలు జరిపారు. ఈ చర్చల్లో జగిత్యాల నియోజకవర్గం ఎమ్మెల్యే డాక్టర్ సంజయ్ కూడా ఉన్నట్లు సమాచారం. ఎర్రబెల్లి పార్టీలో చేరిన తర్వాత ఆయనకు ఎమ్మెల్యే పదవి ఇస్తామని హామీ ఇచ్చినట్లు తెలుస్తోంది. త్వరలోనే ఈ మేరకు రమణ చేరిక ఉంటుందని సమాచారం.