గంటా… ఆఖ‌రికి ఇలా మిగిలిపోయారు

గంటా శ్రీనివాసరావు… మాజీ మంత్రి, టీడీపీ ఎమ్మెల్యే. ఉత్త‌రాంధ్ర రాజ‌కీయాల్లో ప్ర‌ముఖుడు. అయితే, దాదాపు ఏడాదిన్నరగా ఇదిగో తోక అంటే అదిగో పులి అన్నట్టు గంటా శ్రీనివాసరావు పార్టీ మార్పుపై ఊహాగానాలు షికారు చేస్తుంటాయి.

వైసీపీలోకి గంటా వస్తే నా పరిస్థితి ఏంటని మంత్రి అవంతి శ్రీనివాస్‌ నానా యాగీ చేసి పారేశారు. ఏం జరిగిందో తెలియదుకానీ గంటా వైసీపీ గృహప్రవేశం ఆగిపోయింది. అసలు గంటాను పట్టించుకోవడమే మానేశారు. ఏపీ బీజేపీ చీఫ్‌ కాకముందు సోము వీర్రాజు విశాఖ వెళ్లి గంటాతో భేటీ అయ్యారు. దాంతో ఆయన కాషాయ కండువా కప్పుకొంటారని భావించారు. ఆ టాక్ కూడా బ్రేక్ అయిపోయింద‌.ఇ ఈ నేప‌థ్యంలో గంటా పొలిటిక‌ల్ కెరీర్ ఏంట‌నే చ‌ర్చ జ‌రుగుతోంది.

గంటా … లీకుల‌తోనే పంట‌..

గంటా శ్రీనివాసరావు పార్టీ మార‌డం సంగ‌తేమో కానీ ఆయ‌న గురించి మీడియాలో లీకులు మాత్రం ఓ రేంజ్‌లో బయటకొస్తాయి. దీనికి ఆయ‌న చ‌ర్యలు కూడా కార‌ణమే! గంటా పార్టీ మార్పుపై ఊహాగానాలకు ప్ర‌ధాన కార‌ణం ఆయ‌న తీరు. సొంత పార్టీ అయిన టీడీపీకి దూరంగా ఉంటున్నారు. అసెంబ్లీకి రారు.. రిజిస్టర్‌లో అటెండెన్స్‌ కోసం ఓ రోజు వచ్చి కనిపించి వెళ్తారు. వైసీపీలో చేరిపోతున్నారని ఆయన వెనకున్న బ్యాచ్ మీడియాకు లీకులు ఇచ్చారు. సీఎంతో నేరుగా మాట్లాడేశారంటూ చెప్పుకొన్నారు. అయితే, ఇక్కడి ఎమ్మెల్యే కనిపించడం లేదంటూ YCP ఎంపీ విజయసాయిరెడ్డి స్వయంగా విశాఖ నార్త్‌లో ఏర్పాటు చేసిన ఓ సభలో కామెంట్ చేశారంటే గంటా రేంజ్ ఏంటో తెలుసుకోవ‌చ్చు.

బీజేపీలోనూ అదే క‌థ‌

బీజేపీలో చేరిక గురించి అయితే ఓ రేంజ్‌లో ప్ర‌చారం జ‌రిగింది. ఏపీలో బ‌ల‌ప‌డాలి అనుకుంటున్న బీజేపీకి ఇప్పుడు కాపుల బలం కావాలి. కాబట్టి తన అవసరం వాళ్లకు ఉంది. అందుకే రమ్మంటున్నారని సారే మళ్లీ సొంత బ్యాచ్‌తో లీకులు ఇప్పించారని టాక్‌. ఈ ఎపిసోడ్‌ కొన్నాళ్లు చర్చలో ఉన్నా.. ఇప్పుడు చడీ చప్పుడు లేదు. మొత్తంగా కీల‌క పార్టీల‌న్నింటి గురించి ఇదే టాక్ వ‌చ్చిన నేప‌థ్యంలో … అసలు వాళ్లూ వీళ్లు ఎవరూ ఇప్పుడు గంటా గురించి ఆలోచించే పరిస్థితి లేదని.. ఉనికి కోసం ఆయన మాత్రమే తాపత్రయ పడుతున్నారని ప్రచారం జరుగుతోంది. తాను టీడీపీలోనే ఉన్నాను.. ఇంకా ఏ నిర్ణయం తీసుకోలేదని మళ్లీ లీకులు మొదలయ్యాయని అంటున్నారు.