Lover Suicide Attempt: ఇటీవల కాలంలో తెలిసీ తెలియని వయసులో యువతీ యువకులు ప్రేమించుకోవడం, పెద్దలు పెళ్లికి ఒప్పుకోవడం లేదనో లేక ప్రేమించిన యువతి, లేక యువకుడు మోసం చేశాడనో ఆత్మహత్యలు చేసుకోవడం అక్కడక్కడా జరుగుతున్నాయి. అయితే ఎక్కువ మంది తమ భావాలను, ఆవేదనలను వాట్సాప్, ఫేస్ బుక్ ల ద్వారా స్నేహితులకు షేర్ చేసుకుంటుంటారు. ఒక్కో సారి ఇది కూడా వారి ప్రాణాలను కాపాడేందుకు ఉపయోగపడుతున్నాయి.
విషయంలోకి వెళితే..ప్రకాశం జిల్లా మారెళ్ల గ్రామానికి చెందిన నాగభూషణం అనే యువకుడు ఒంగోలు నగరంలో ఓ ప్రైవేటు సంస్థలో ఉద్యోగం చేస్తున్నాడు. ఈ క్రమంలో ఓ యువతితో ప్రేమలో పడ్డాడు. కొద్ది కాలంగా ఇద్దరూ ప్రేమించుకుంటున్నారు. అయితే వారి మధ్య ఎందుకు బేధాభిప్రాయాలు వచ్చాయో గానీ లవ్ బ్రేకప్ అయ్యింది. గత కొద్ది రోజులుగా ప్రేమ విఫలమైన నాగభూషణం మరో దేవదాసుగా మారడంతో విషయం తల్లిదండ్రులకు తెలిసింది. వెంటనే అప్రమత్తమైన వాళ్లు తమ కుమారుడు ఏమైనా అఘాయిత్యం చేసుకుంటాడేమో అన్న భయంతో ఓ ఇద్దరు యువకులను పురమాయించి తమ కుమారుడిపై ఒక కన్నేసి ఉంచాలని సూచించారు. అయితే వీళ్ల కళ్లుకప్పి నాగభూషణం తన రూమ్ నుండి పారిపోయి నగర శివారుకు చేరుకున్నాడు. కాసేపటిలో తాను చనిపోతున్నాననీ, అందుకు లవ్ ఫేయిల్యూరే కారణం అంటూ పేస్ బుక్ లో వీడియో పోస్టు చేశాడు నాగభూషణం.
Read More: AP EAP CET: ఏపిలో ఉమ్మడి ప్రవేశ పరీక్షల తేదీలు ఇవే..
అయితే నాగభూషణం ఫేస్ బుక్ లో షేర్ చేసిన వీడియోను చూసిన నెల్లూరులోని స్నేహితుడు వెంటనే ఒంగోలు పోలీసులకు సమాచారం ఇచ్చాడు. దీనిపై వెంటనే స్పందించిన సీఐ శ్రీనివాసరెడ్డి అతని సెల్ ఫోన్ ను ట్రాక్ చేసి హుటాహుటిన ఘటనా స్థలానికి చేరుకున్నారు. అయితే సీఐ సిబ్బందితో అక్కడకు వెళ్లే సమయానికే పురుగు మందు తాగి నాగభూషణం పడి పోయి ఉన్నాడు. వెంటనే పోలీసులు అతన్ని ప్రభుత్వ ఆసుపత్రికి తరలించగా అతను కోలుకుంటున్నాడు. తమ కుమారుడిని ప్రాణాపాయం నుండి కాపాడిన పోలీసులకు బాధితుడి తల్లిదండ్రులు కృతజ్ఞతలు తెలియజేశారు.