APPSC JOBS: ఏపి ప్రభుత్వం నిరుద్యోగ యువతీ యువకులకు గుడ్ న్యూస్ అందిస్తోంది. నిరుద్యోగ యువతీ యువకులకు ప్రభుత్వం ఉద్యోగం సాధించడం అనేది ఓ కల. ఆ కల సాకారం చేసుకునేందుకు కష్టపడి చదువుతూనే ఉంటారు. కొందరు అయితే ప్రభుత్వ ఉద్యోగం కోసమే ప్రత్యేకంగా శిక్షణలు పొందుతుండగా, మరి కొందరు వేరు వేరు ఉద్యోగాలు చేసుకుంటూ ప్రభుత్వ నోటిఫికేషన్ ల కోసం ఎదురు చూస్తున్నారు. ఇటీవల జగన్మోహనరెడ్డి సర్కార్ జాబ్ కాలెండర్ విడుదల చేయడంతో నిరుద్యోగ యువతలో ఆశలు చిగురించాయి. అయితే లక్షల సంఖ్యలో ప్రభుత్వ ఖాళీలు ఉండగా కేవలం వేల సంఖ్యలో పోస్టులకే జాబ్ కాలెండర్ విడుదల చేయడం పట్ల కొంత నిరుత్సాహాత వ్యక్తం చేస్తున్నారు. తాజాగా ఇప్పుడు ఏపిపిఎస్సీ ద్వారా పోస్టులకు భర్తీ చేయనున్నట్లు వార్తలు వస్తుండటంతో వారు సిద్ధమవుతున్నారు.
ఏపీపీఎస్సీ నుండి 1200 పోస్టులకు పైగా భర్తీకి నోటిఫికేషన్లు జారీ కానున్నాయి. ఇందుకు సంబంధించిన పోస్టుల సంఖ్యపై ప్రభుత్వం కసరత్తు ప్రారంభించింది. త్వరలో దీనికి సంబంధించి సమగ్రంగా ఉత్తర్వులు వెల్లడి కానున్నాయి. గ్రూపు -1, గ్రూపు -2 సహా 1200 పోస్టుల భర్తీకి ఆగస్టులో నోటిఫికేషన్లు జారీ చేస్తామని ఏపీపీఎస్సీ సభ్యుడు ఎస్ సలాంబాబు మీడియాకు తెలియజేశారు. ప్రస్తుతం ఎపిపిఎస్సీ వద్ద 1,180 వరకు ఖాళీ పోస్టుల వివరాలు అందుబాటులో ఉన్నాయి.
ఇవి కాకుండా గ్రూపు 1, గ్రూపు 2 కేటగిరిల్లో మరిన్ని పోస్టులు వచ్చే అవకాశం ఉందని ఆయన చెప్పారు. 2018లో జారీ చేసిన నోటిఫికేషన్లకు సంబంధించి రిజర్వేషన్ల కేటగిరిల్లో అర్హులైన అభ్యర్థులు లేక దాదాపు 364 పోస్టులు భర్తీ కాలేదు. ఈ పోస్టుల తో కలుపుకుని ఇతర ఖాళీలకు వీలుగా చర్యలు తీసుకుంటున్నామని ఆయన తెలియజేశారు.