MP RRR Case: రాజద్రోహం తదితర నేరారోపణతో ఏపి సీఐడీ అరెస్టు చేసిన వైసీపీ రెబల్ ఎంపి రఘురామ కృష్ణంరాజు వ్యవహారంలో కొత్తకొత్త ట్విస్ట్ లు వెలుగుచూస్తున్నాయి. రెండు రోజుల క్రితం సుప్రీం కోర్టు రఘురామ కృష్ణం రాజుకు బెయిల్ మంజూరు చేసిన సంగతి తెలిసిందే. ప్రస్తుతం ఆర్మీ ఆసుపత్రిలో చికిత్స పొందుతున్న రఘురామ కృష్ణం రాజుకు బెయిల్ మంజూరైన నేపథ్యంలో ఈ రోజు గుంటూరు ట్రయిల్ కోర్టులో రఘురామ న్యాయవాదులు పూచికత్తులు సమర్పించి విడుదల చేయించుకోవాలని ప్రయత్నించారు. అయితే రఘురామ ఆరోగ్య పరిస్థితిపై నివేదిక, డిశ్చార్జ్ సమ్మరి అందజేయాలని మేజిస్ట్రేట్ ఆర్మీ అధికారులను ఆదేశించారు. మరో నాలుగు రోజుల పాటు రఘురామకు చికిత్స అవసరం అని ఆర్మీ ఆసుపత్రి వైద్యులు చెప్పినట్లు తెలిసింది. దీంతో రఘురామ విడుదల ఆలస్యం అవుతోంది. ఈ నేపథ్యంలోనే రఘురామ ఆసుపత్రి నుండి డిశ్చార్జ్ కాగానే అదుపులోకి తీసుకుని గుంటూరుకు తీసుకురావాలని ఎస్కార్ట్ ను ఉన్నతాధికారులు ఆదేశించినట్లు సమాచారం.
దీనిపై రఘురామ కృష్ణం రాజు న్యాయవాది గుంటూరు అర్బన్ ఎస్పీకి కోర్టు దిక్కార నటీసులు పంపినట్లు తెలుస్తోంది. రఘురామ ఆసుపత్రి నుండి డిశ్చార్జ్ కాగానే వెంటనే గుంటూరుకు తీసుకురావాలని ఎస్కార్ట్ ను ఆదేశించినట్లు సమాచారం అందిందని తెలిపారు. సుప్రీం కోర్టు ఉత్తర్వుల ప్రకారం రఘురామ బెయిల్ పై విడుదల అయినట్లేననీ, విడుదలైన పది రోజులకు బాండ్లను కోర్టులో సమర్పించాలని సుప్రీం కోర్టు ఆదేశించిందని న్యాయవాది దుర్గాప్రసాద్ తెలిపారు. సుప్రీం కోర్టు ఆదేశాలకు విరుద్ధంగా రఘురామను తీసుకురావాలని ఎస్కార్ట్ ను పంపడం కోర్టు ఆదేశాలను దిక్కరించినట్లేనని ఆయన పేర్కొన్నారు. అందుకే నోటీసులు ఇస్తున్నట్లు ఆయన పేర్కొన్నారు. హైదరాబాద్ నుండి గుంటూరు అర్బన్ ఎస్పీకి దుర్గా ప్రసాద్ నోటీసులు పంపారు.
మరో పక్క రఘురామ కృష్ణం రాజు ఆర్మీ ఆసుపత్రి కమాండర్ కు లేఖ రాశారు. పెయిన్ కిల్లర్స్, యాంటీ బయాటిక్స్ వాడుతున్నా కాలి నొప్పి ఇంకా తగ్గలేదనీ, బీపీ కూడా ఎక్కువగా కనిపిస్తోందని పేర్కొన్నారు. తన ఆరోగ్యం సరిగా లేదనీ, మరో రెండు మూడు రోజులు ఆసుపత్రిలోనే డాక్టర్ ల పర్యవేక్షణలో తనకు చికిత్స అందించాలని కోరారు. ఒక వేళ డిశ్చార్జ్ చేయాలని భావిస్తే డిశ్చార్జ్ సమ్మరీలో తన ఆరోగ్య పరిస్థితి స్పష్టంగా పేర్కొనాలని కోరారు. సుప్రీం కోర్టు ఆదేశాలకు విరుద్దంగా ఏపికి చెందిన పోలీసులు కొందరు పోలీసులు ఆర్మీ ఆసుపత్రి వద్ద ఉన్నట్లు తెలుస్తోందని రఘురామకృష్ణం రాజు పేర్కొన్నారు.
