డాక్టర్ ఎన్టీఆర్ హెల్త్ యూనివర్శిటీ ని ఏపి సర్కార్ రీసెంట్ గా డాక్టర్ వైఎస్ఆర్ హెల్త్ యూనివర్శిటీగా మార్చిన సంగతి తెలిసిందే. హెల్త్ యూనివర్శిటికీ ఎన్టీఆర్ పేరు తొలగించి వైఎస్ఆర్ పేరు పెట్టడాన్ని టీడీపీ నేతలు, ఎన్టీఆర్ అభిమానులు, ఆయన కుటుంబ సభ్యులు తప్పుబడుతున్నారు. వైసీపీ నేతలు ప్రభుత్వ నిర్ణయాన్ని సమర్ధిస్తూ టీడీపీపై విమర్శలు చేస్తున్నారు. ఎన్టీఆర్ ను వెన్నుపోటు పొడిచి పదవి నుండి తొలగించిన వారికి మాట్లాడే అర్హత లేదని పేర్కొంటున్నారు. ఈ అంశంపై ప్రస్తుతం వైసీపీ లో నేతగా ఉన్న దివంగత ఎన్టీఆర్ సతీమణి నందమూరి లక్ష్మీపార్వతి స్పందించకపోవడంపై పలు ఛానల్స్ లో, సోషల్ మీడియాలో ఆమెకు వ్యతిరేకంగా కామెంట్స్ వస్తున్నాయి. దీనిపై లక్ష్మీపార్వతి నేడు ఘాటుగా స్పందించారు.
తనపై తప్పుడు కథనాలు ప్రసారం చేస్తున్న వారిపై కేసులు పెడతామనిలక్ష్మీపార్వతి హెచ్చరించారు. ఏబీఎన్ తప్పుడు కథనాలు ఇస్తుందంటూ మండిపడ్డారు. ఏబీఎన్ ఇస్తున్న కథనాలపై వివరణ ఇచ్చేందుకే మీడిాయా ముందుకు వచ్చినట్లు చెప్పారు. ఎన్టీఆర్ తో తనకు ఎలా వివాహం జరిగింది అనే విషయాలను వివరించారు.తనను వివాహం చేసుకున్న విషయంపై స్వయంగా ఎన్టీఆర్ చివరి మీడియా సమావేశంలో మాట్లాడారని గుర్తు చేస్తూ అప్పటి వీడియోను ప్లే చేసి చూపించారు. తనపై చెత్త పలుకులు రాస్తే కేసు అవుతుందని హెచ్చరించారు. ఎన్టీఆర్ అధికారంలో ఉండగా గానీ,. అధికారంలో లేనప్పుడు గానీ తాను రాజకీయాల్లోకి వస్తానని చెప్పలేదన్నారు. తాను ఎలాంటి స్వార్ధం కోసం ఎన్టీఆర్ జీవితంలోకి రాలేదనీ, తాను ఏ రోజు పార్టీ విషయాల్లో జోక్యం చేసుకోలేదని తెలిపారు.
రాష్ట్రంలో వైద్య కళాశాలలు తీసుకురావడంతో పాటు పేద వాళ్లకు ఉచిత వైద్యం అందించేందుకు ఆరోగ్య శ్రీ పథకాన్ని ప్రవేశపెట్టడం, తాజాగా మరో 17 మెడికల్ కాలేజీలు ఏర్పాటు చేస్తున్న నేపథ్యంలో స్వతహాగా వైద్యుడైన దివంగత సీఎం వైఎస్ఆర్ పేరు హెల్త్ యూనివర్శిటీకి పెట్టాలని ప్రభుత్వం నిర్ణయం తీసుకుందని, ఇది సముచిత నిర్ణయంగా ప్రభుత్వం భావించిందన్నారు లక్ష్మీపార్వతి. ఎన్టీఆర్ పేరును దేనికి పెడదామన్న దానిపై ప్రభుత్వం పరిశీలన చేస్తుందని లక్ష్మీపార్వతి చెప్పారు. ఎన్టిఆర్ కు వెన్నుపోటు పొడిచిన వాళ్లకు ఆయన గురించి మాట్లాడే అర్హత లేదని అన్నారు లక్ష్మీపార్వతి. ఎన్టీఆర్ కు ద్రోహం చేసిన వారే ఇప్పుడు ఆయన గురించి మాట్లాడుతున్నారని విమర్శించారు.
