Panchayat Polls : ఏపిలో మొదటి విడత పంచాయతీ ఎన్నికల పోలింగ్ ముగిసింది. 12 జిల్లాల్లో 2,723 పంచాయతీ సర్పంచ్ పదవులకు, 20,157 వార్డు పదవులకు అభ్యర్థులు తమ అదృష్టాన్ని పరీక్షించుకున్నారు. అక్కడక్కడా చిన్న చిన్న ఉద్రిక్తతలు మినహా పోలింగ్ ప్రశాంతంగా ముగిసింది. మధ్యాహ్నం 3.30గంటల సమయానికి క్యూలైన్ లలో ఉన్న వారికి ఓటు హక్కు వినియోగించుకునేందుకు అవకాశం కల్పించారు. మరి కొద్ది సేపటిలో ఓట్ల లెక్కింపు నిర్వహించి విజేతలను ప్రకటించనున్నారు. అనంతరం ఉప సర్పంచ్ ఎన్నిక చేపడతారు. నేటి పోలింగ్ లో ఎక్కడా అవాంఛనీయ సంఘటనలు జరగలేదు. తొలి విడత గ్రామ పంచాయతీ ఎన్నికల్లో 81.78 శాతం పోలింగ్ నమోదు అయినట్లు ఎస్ఈసీ ప్రకటనలో తెలిపింది. పోలింగ్ జరిగిన 12 జిల్లాల్లో అత్యధికంగా కృష్ణాజిల్లాలో 85.06 శాతం పోలింగ్ జరిగింది.
మధ్యాహ్నం 2.30 గంటల సమయానికి శ్రీకాకుళం జిల్లాలో 69శాతం, విశాఖపట్నం లో 76.27శాతం, ఈస్ట్ గోదావరి జిల్లాలో 76.55 శాతం, వెస్ట్ గోదావరి జిల్లా 73.55 శాతం, కృష్ణా జిల్లా 81శాతం, గుంటూరులో 76 శాతం, ప్రకాశం జిల్లాలో 73.19 శాతం, నెల్లూరులో 76 శాతం, చిత్తూరులో 78.06 శాతం, కడప జిల్లాలో 71.63 శాతం, కర్నూలులో 79.51 శాతం, అనంతపూర్ జిల్లాలో 75.78 శాతం ఓటింగ్ నమోదు అయ్యింది.
