జనసేన బస్సు యాత్ర వాయిదా గురించి, వైసీపీకి రాబోయే ఎన్నికల్లో సీట్ల గురించి, రాజధాని అమరావతిపై వైసీపీ మాట మార్చిన విషయంపై జనసేన అధినేత అధినేత పవన్ కళ్యాణ్ చేసిన వ్యాఖ్యలపై మాజీ మంత్రి, మచిలీపట్నం వైసీపీ ఎమ్మెల్యే పేర్ని నాని స్పందించారు. పవన్ కళ్యాణ్ పై వ్యంగ్యంగా విమర్శనాస్త్రాలు సంధించారు. దసరాకు వస్తాను.. మీ సంగతి చూస్తాను అన్న పవన్ నాయుడు ఇప్పుడెక్కడ ఉన్నాడు అని ప్రశ్నించారు. పవన్ కళ్యాణ్ దసరాకు పులి వేషం వేసుకొచ్చినా బాగుండేది అని ఎద్దేవా చేశారు.
చిలక జోస్యంలో కేవలం వైసీపీ సీట్లే వస్తాయా.. జనసేనకు ఎన్ని సీట్లలో పోటీ చేస్తుందో తెలియదా అని పేర్ని ప్రశ్నించారు. చంద్రబాబు చేసిన తప్పులను జగన్ కు పవన్ ఆపాదిస్తున్నారని విమర్శించారు. పవన్ రాజకీయాలు అన్నీ చంద్రబాబు కోసమేనని అన్నారు. అమరావతి అభివృద్ధి పై చర్చకు తాను సిద్దమనీ పవన్ వస్తారా అని సవాల్ విసిరారు. సొంత అన్నకు వెన్నుపోటు పొడిచిన వ్యక్తి పవన్ కళ్యాణ్ అని అన్నారు. చిరంజీవి ప్రజల కోసం పని చేస్తే పవన్ కళ్యాణ్ చంద్రబాబు కోసం పని చేస్తున్నారని విమర్శించారు. రాజకీయాల్లో పవన్ కళ్యాణ్ చేసినన్ని తప్పులు చిరంజీవి చేయలేదని అన్నారు పేర్ని నాని.
పవన్ కళ్యాణ్ బస్సు యాత్ర వాయిదాపై మాట్లాడుతూ .. పొద్దునేమో లోకేష్ నాయుడు తూచ్ అన్నాడు, మధ్యాహ్నానికి పవన్ నాయుడు తూచ్ అన్నాడనీ, ఇద్దరి యాత్రలకు చంద్రబాబు పర్మిషన్ ఇవ్వాలి కదా అని వ్యంగ్యంగా విమర్శించారు. పవన్ కళ్యాణ్ బస్సు యాత్ర ఎందుకు కాన్సిల్ చేసుకున్నట్లు.. షూటింగ్ లు ఏమైనా ఉన్నాయా అని ప్రశ్నించారు. అడ్వాన్స్ లు ఇచ్చే ప్రొడ్యూసర్లకు ఆయాసం వస్తుందేమో కానీ తను ఆయాసం లేకుండా అడ్వాన్స్ లు తెగ తీసుకుంటారు కదా అని అన్నారు. ఇప్పటి వరకూ అడ్వాన్స్ లు తీసుకున్న సినిమాలు పూర్తి కావాలంటే 2050 వరకూ ఆగాల్సిందేనని పేర్ని అభిప్రాయపడ్డారు.
వైసీపీపై జనసేన అధినేత పవన్ కళ్యాణ్ కీలక వ్యాఖ్యలు .. బస్సు యాత్ర వాయిదా .. ఎందుకంటే..?
