ఆంధ్రప్రదేశ్ లో పలువురు ఐఏఎస్ అధికారులను బదిలీ చేస్తూ శనివారం ఉత్తర్వులు జారీ అయ్యాయి. పాఠశాల విద్యాశాఖలో మౌళిక వసతుల కల్పన కోసం ప్రత్యేకాదికారిని నియమించాలని సీఎం వైఎస్ జగన్ ఆదేశాల మేరకు ప్రభుత్వం కొత్త పోస్టు ఏర్పాటు చేసింది. ఆ మేరకు పాఠశాలల్లో మౌళిక వసతలు కల్పన కమిషనర్ పోస్టు ఏర్పాటు చేసి సీనియర్ ఐఏఎస్ కాటంనేని భాస్కర్ కు ఆ బాధ్యతలు అప్పగించారు. మిషన్ క్లీన్ కృష్ణా – గోదావరి కెనాల్స్ కమిషనర్ గా ఆయన అదనపు బాధ్యతల్లో కొనసాగనున్నారు. సర్వశిక్షా అభియాన్ అదనపు ప్రాజెక్టు డైరెక్టర్ గా బి శ్రీనివాసరావు నియమితులైయ్యారు. దీంతో పాటు రైతు బజార్ల సీఈఓగా శ్రీనివాసరావు అదనపు బాధ్యతలు అప్పగిస్తూ ప్రభుత్వం ఆదేశాలు జారీ చేసింది.
సాంకేతిక విద్యాశాఖ డైరెక్టర్ గా నాగరాణిని నియమించిన ప్రభుత్వం .. సాంకేతిక విద్యాశాఖ డైరెక్టర్ బాధ్యతల నుండి పోల బాస్కర్ ను రిలీవ్ చేసింది. జౌళి, చేనేత శాఖ కమిషనర్ గా ఎం ఎం నాయక్ నియమితులైయ్యారు. అలాగే ఎంఎం నాయక్ కు ఆప్కో సీఎండీ, ఖాదీ విలేజ్ బోర్డు సీఈఓ గా అదనపు బాధ్యతలు అప్పగించారు. బీసీ సంక్షేమ శాఖ ముఖ్య కార్యదర్శి జయలక్ష్మికి సాంఘీక సంక్షేమ శాఖ ముఖ్య కార్యదర్శిగా అదనపు బాధ్యతలు అప్పగిస్తూ ఉత్తర్వులు జారీ అయ్యాయి.
