ప్ర‌త్య‌ర్థుల‌ను ఢీకొట్టాలంటే ప‌క్కా వ్యూహాలు ఉండాలి. అందుకు త‌గిన‌ట్లుగా కార్యాచ‌ర‌ణ సైతం ఉండాలి . పైగా తెలంగాణ ముఖ్య‌మంత్రి కేసీఆర్ లాంటి రాజ‌కీయ వ్యూహ‌క‌ర్త పై పై చేయి సాధించాలంటే ఇంకెన్ని ఎత్తుగ‌డ‌లు క‌లిగి ఉండాలో చెప్ప‌న‌క్క‌ర్లేదు.
కానీ టీఆర్ఎస్ రాజ‌కీయ ప్ర‌త్య‌ర్థి అయిన కాంగ్రెస్ పార్టీ మాత్రం అంత‌ర్గ‌త రాజ‌కీయాల‌తో స‌త‌మ‌తం అవుతోందంటున్నారు. తాజాగా రేవంత్ రెడ్డి కేంద్రంగా ఈ కొత్త ప్రచారం జరుగుతోంది.
రేవంత్ రెడ్డి కే ఓటు
తెలంగాణ ప్రదేశ్‌ కాంగ్రెస్ కమిటీ చీఫ్ ప‌ద‌వికి ఉత్త‌మ్ కుమార్ రెడ్డి రాజీనామా నేప‌థ్యంలో కొత్త నేత ఎంపిక క‌స‌ర‌త్తును పార్టీ ఇంఛార్జ్‌ మాణిక్యం ఠాగూర్ నిర్వ‌హించారు. కొత్త పీసీసీ చీఫ్ ఎంపిక కోసం AICC దూత అన్ని ర‌కాల వ‌డ‌పోత‌లు చేశారు. పీసీసీ చీఫ్ ప‌ద‌వికి నేత పేరు ఫైనల్‌ అయినట్టు ఢిల్లీ నుంచి హైదరాబాద్‌ వరకు చర్చ జరుగుతోంది. దీంతో మిగిలిన పదవులపై పోటీ నెలకొంది. ఔను. ఇటు టీపీసీసీపైనే క్లారిటీ రాని త‌రుణంలో ఇత‌ర‌త్రా పోస్టుపైనా టాక్ వినిపిస్తోంది.
మహిళా నేత‌కు జై
TPCCలో వర్కింగ్ ప్రెసిడెంట్ పదవి మహిళకు ఇవ్వాలనే డిమాండ్‌ తెరమీదకు వస్తోంది. ఇద్దరూ ఉమ్మడి వరంగల్‌ జిల్లాకు చెందిన మహిళా నాయకుల పేర్లు తెరమీదకు వ‌స్తున్నాయి. ఎమ్మెల్యే సీతక్క, మాజీ మంత్రి కొండా సురేఖకు టీపీసీసీ వర్కింగ్ ప్రెసిడెంట్ ఇవ్వాల‌ని చర్చ జ‌రుగుతున్న‌ట్లు స‌మాచారం. అయితే , ఈ అంశంపై ప్రచారం జరగడం వెనక కూడా కొందరు నాయకులు వ్యూహం ఉందన్నది గాంధీభవన్‌ వర్గాల టాక్. రేవంత్ రెడ్డి వ‌ర్గానికి చెందిన సీతక్క కు పదవి కోసం ప్రచారం చేస్తున్నార‌ని ఇంకొంద‌రు అంటున్నారు.
