Steel Plant: ఆంధ్రప్రదేశ్ లో భారీ గా పెట్టుబడులు పెట్టేందుకు, స్టీల్ ప్లాంట్ ఏర్పాటునకు ఓ ప్రముఖ సంస్థ ముందుకు రావడం గుడ్ న్యూస్ కాగా మరో పక్క విశాఖ స్టీల్ ప్లాంట్ అమ్మకానికి కేంద్రం మరో ముందడుగు వేయడం బ్యాడ్ న్యూస్. ఈ పరిణామాలు బుధవారం జరిగాయి. ఆంధ్రప్రదేశ్ లో భారీ పెట్టుబడులు పెట్టేందుకు ఎస్సార్ గ్రూపు సన్నద్ధత వ్యక్తం చేసింది. ఎస్సార్ గ్రూపు ప్రతినిధులు బుధవారం సీఎం వైఎస్ జగన్మోహనరెడ్డిని క్యాంప్ కార్యాలయంలో భేటీ అయ్యారు. కడప జిల్లాలో స్టీల్ ప్లాంట్ ఏర్పాటు చేయనున్నట్లు సీఎం వైఎస్ జగన్ కు తెలియజేశారు. ఈ ఏడాది నవంబర్ నెలలో స్టీల్ ప్లాంట్ పనులకు శంకుస్థాపన చేస్తామని సీఎం జగన్ కు ఎస్సార్ గ్రూప ప్రతినిధులు తెలిపారు. సీఎం జగన్ ను కలిసిన వారిలో ఎస్సార్ గ్రూపు హెడ్ ప్రశాంత్ రూయా, వైస్ చైర్మన్ జె మెహ్రా, ఏపి పరిశ్రమల శాఖ మంత్రి మేకపాటి గౌతం రెడ్డి లు ఉన్నారు.
కాగా ఓ పక్క విశాఖ స్టీల్ ప్లాంట్ ప్రైవేటీకరణ ప్రతిపాదనను కార్మిక సంఘాలతో పాటు వివిధ రాజకీయ పక్షాలు తీవ్రంగా వ్యతిరేకిస్తున్న సంగతి తెలిసిందే. రాష్ట్ర ప్రభుత్వం కూడా విశాఖ స్టీల్ ప్లాంట్ అమ్మకాన్ని వ్యతిరేకిస్తూ అసెంబ్లీలో తీర్మానం చేసింది. సీఎం వైఎస్ జగన్ గతంలోనే ప్రధాన మంత్రి నరేంద్ర మోడీకి లేఖ కూడా రాశారు. అయినప్పటికీ కేంద్ర ప్రభుత్వం విశాఖ స్టీల్ ప్లాంట్ అమ్మకానికే ముందడుగు వేసింది.
కన్సల్టెంట్ నియామకానికి కేంద్రం నోటిపికేషన్ జారీ చేసింది. విశాఖ స్టీల్ ప్లాంట్ తో పాటు అనుబంధ సంస్థలన్నీ వంద శాతం అమ్ముతామని ప్రకటనలో కేంద్రం పేర్కొన్నది. ఏపిలోని జగ్గయ్యపేట, తెలంగాణలోని మాదారం స్టీల్ ప్లాంట్ మైన్స్ ను కూడా అమ్మకానికి కేంద్రం పెట్టింది. బిడ్ లో పాల్గొనేందుకు లక్ష రూపాయల డిపాజిట్, కోటి రూపాయల బ్యాంక్ గ్యారెంటీ చూపాలని నోటిఫికేషన్ లో కేంద్రం పేర్కొన్నది.
