TRS: తెలంగాణ రాష్ట్రంలో టీఆర్ఎస్ వర్సెస్ బీజేపీ నేతలు అన్నట్లుగా మాటల యుద్ధం జరుగుతున్న సంగతి తెలిసిందే. ప్రధానమంత్రి నరేంద్ర మోడీని టీఆర్ఎస్ నేతలు టార్గెట్ చేస్తుంటే… తెలంగాణ సీఎం కేసీఆర్ ను బీజేపీ నేతలు విమర్శిస్తుంటారు. తాజాగా అలా తెలంగాణ మంత్రి ,టీఆర్ఎస్ నేత ప్రధానమంత్రి నరేంద్ర మోడీని టార్గెట్ చేశారు. ప్రధాని నరేంద్ర మోడీ తన సొంత రాష్ట్రం నుంచి బయటకు రావాలని మంత్రి ఎర్రబెల్లి దయాకర్రావు కామెంట్ చేశారు.
ఎర్రబెల్లి ఘాటు వ్యాఖ్యలు
ప్రధానమంత్రి నరేంద్ర మోడీకి గుజరాత్ తప్ప ఏ రాష్ట్రం కనిపించడం లేదని మంత్రి ఎర్రబెల్లి దయాకర్ రావు విమర్శించారు. అందుకే ఆయన రాష్ట్రాల్లో తిరిగి కరోనా వాస్తవ పరిస్థితులు తెలుసుకోవాలని మంత్రి ఎర్రబెల్లి సూచించారు. కేంద్రంతో బీజేపీ నేతలు సంప్రదించి రాష్ట్రానికి టీకాలు తెప్పించి వ్యాక్సిన్ కొరత సమస్యను తీర్చాలని మంత్రి డిమాండ్ చేశారు. కొవిడ్ బాధితులకు చికిత్స అందిస్తున్న వరంగల్ ఎంజీఎం ఆస్పత్రిపై విశ్వాసం వల్లే రోగులు చికిత్స పొందుతున్నారని మంత్రి అన్నారు. తెలంగాణ సీఎం కేసీఆఱ్ పర్యటనతో ఈ విశ్వాసం స్పష్టమైందని పేర్కొన్నారు.
రాములమ్మ సంచలన కామెంట్లు
అయితే, బీజేపీ నేత విజయశాంతి తెలంగాణ సీఎం కేసీఆర్ వరంగల్ పర్యటనపై విమర్శలు చేశారు. సీఎం కేసీఆర్ కరోనా రోగులను పరామర్శించడానికి వరంగల్ ఎంజీఎం ఆస్పత్రిని సందర్శిస్తే ప్రజలు మాత్రం 2015 నాటి జ్ఞాపకాల్లోకి వెళ్ళారని సెటైర్ వేశారు. చిన్నా చితకా హామీలు ఎన్నో ఆయన నోట్లోంచి ముత్యాల్లాగా రాలాయని ఇప్పుడు వాటి గురించి ప్రజలు ఆలోచిస్తున్నారని విజయశాంతి అన్నారు. సీఎం కేసీఆర్ లాక్ డౌన్ సమయం చూసుకొని పర్యటనలు చేస్తున్నారని ఎద్దేవా చేశారు. ప్రజలంతా ఇళ్ళలో ఖైదీల్లా కాలం గడుపుతున్న సమయంలో ఎంజిఎంని సందర్శించి వచ్చారని మండిపడ్డారు.