Vijayawada International airport: విజయవాడ విమానాశ్రయం నూతన రన్ వే వచ్చే నెల 15వ తేదీ నుండి అందుబాటులోకి రానున్నది. రెండేళ్ల క్రితమే రన్ వే పనులు పూర్తి అయినప్పటికీ డీజీసీఏ అనుమతులు రాకపోవడంతో ప్రారంభోత్సవానికి నోచుకోలేదు. ఇప్పటికే డీజీసీఏ వర్చువల్ తనిఖీలు పూర్తి కాగా, విమానాశ్రయ అధికారులు ఫ్రిక్షన్ టెస్ట్ ను పూర్తి చేసారు. కొత్త రన్ వే పొడవు 3,523 అడుగులు, పాత రన్ వే పొడవు 7,500 అడుగులు. జూలై 15న తేదీన నూతన రన్ వే ప్రారంభిస్తుండటంతో రెండు రన్ వేలు కలిపి మొత్తంగా 11,023 అడుగుల రన్ వే అందుబాటులోకి రానుంది.
దీంతో రాష్ట్రంలోని విమానాశ్రయాల్లో అతి పెద్ద రన్ వే కల్గిన ఎయిర్ పోర్టుగా ఈ విమానాశ్రయం నిలవనున్నది. ఈ రన్ ప్రారంభంతో అంతర్జాతీయ భారీ విమానాల రాకపోకలకు అవకాశం ఏర్పడనుంది. ఇంటర్నేషనల్ ఫ్లైట్స్ రాకపోకలు సాగిస్తే ప్రయాణీకులు తమ గమ్యస్థానాలకు చేరేందుకు విమానాలను మారాల్సిన అవసరం తప్పుతుంది. దీంతో విజయవాడకు ఎయిర్ ట్రాఫిక్ కూడా పెరిగే అవకాశం ఉంటుంది. జూలై 15వ తేదీ నుండి నూతన రన్ వేని వినియోగంలోకి తీసుకురావాలని డీజీసీఏ నిర్ణయించింది. నూతన రన్ వే అందుబాటులోకి రానుండటంతో విజయవాడ విమానాశ్రయం ఇకపై భారీ అంతర్జాతీయ విమానాలు కూడా ల్యాండింగ్, టేకాఫ్ అయ్యే వీలు కలుగుతోంది.
Read More: USA: కదులుతున్న విమానం నుండి ప్రయాణీకుడు జంప్..! ఆ తరువాత ఏమైందంటే..!!
బ్రిటీష్ వారి పాలనా కాలంలో వారి అవసరాలకు విజయవాడ సమీపంలోని గన్నవరం వద్ద విమానాశ్రయాన్ని ఏర్పాటు చేయగా స్వాతంత్ర్యం వచ్చి ఇన్నాళ్లకు ఇది అంతర్జాతీయ విమానాశ్రయం స్థాయికి చేరుతుండటం పట్ల విమాన ప్రయాణీకులు హర్షం వ్యక్తం చేస్తున్నారు.
