Gun fired: ఓ వైసీపీ నేత తన లైసెన్సు రివాల్వర్ తో తన సోదరుడిని కాల్చి ఆపై అతను కాల్చుకుని ఆత్మహత్యకు పాల్పడిన ఘటన కడప జిల్లాలో జరిగింది. పెనగలూరు మండలం నల్లపురెడ్డిపల్లి గ్రామానికి చెందిన వైసీపీ నేత శివ ప్రసాదరెడ్డి తన లైసెన్డ్ తుపాకీతో పార్థసారధి రెడ్డిని కాల్చి చంపారు. అనంతరం తనకు తాను కాల్చుకుని శివ ప్రసాదరెడ్డి ఆత్మహత్య చేసుకున్నాడు.
ఆస్తి విషయంలో వివాదాలే ఇద్దరి మధ్య గొడవలకు కారణమని గ్రామస్తులు పేర్కొంటున్నారు. సమాచారం అందుకున్న పోలీసులు ఘటనా స్థలానికి చేరుకుని మృతదేహాలను పోస్టుమార్టం నిమిత్తం ఆసుపత్రికి తరలించారు. కేసు నమోదు చేసి దర్యాప్తు చేస్తున్నారు. ఈ ఘటనతో గ్రామంలో విషాదశ్చాయలు అలుముకున్నాయి. ఇరు కుటుంబాలు శోకసంద్రంలో మునిగిపోయాయి.
ఆస్తి వివాదాల నేపథ్యంలో తొలుత పార్ధసారధి రెడ్డి గొడ్డలిలో శివప్రసాదరెడ్డిపై దాడికి వెళ్లడంతో ఆయన ఆత్మరక్షణ కోసం లైసెన్డ్ గన్ తో ఫైర్ చేశారనీ, ఆ తరువాత సోదరుడిని చంపేశాను అన్న మనస్థాపంతో శివప్రసాదరెడ్డి కూడా తనకు తాను కాల్చుకుని ఆత్మహత్య చేసుకున్నాడని సమాచారం.
కాగా ఈ వార్తను పులివెందుల మండలంలో జరిగినట్లు ప్రధాన మీడియా సంస్థలు ప్రచారం చేస్తున్నాయి. అయితే పులివెందుల మండలంలో నల్లపురెడ్డిపల్లె అనే గ్రామం లేదు. నల్లపురెడ్డిపల్లె గ్రామం పులివెందుల సమీపంలోని పెనగలూరు మండల పరిధిలో ఉంది. ఇది కోడూరు నియోజకవర్గ పరిధిలోకి వస్తుంది. కానీ ప్రధాన మీడియా సంస్థలతో పాటు సోషల్ మీడియాలోనూ పులివెందుల మండలంలో ఘటన జరిగినట్లు ప్రచారం జరుగుతోంది. పులివెందుల మండలానికి నల్లపురెడ్డిపల్లి గ్రామానికి సంబంధం లేదు. సోదరుడిపై కాల్పులు జరిపి తనకు తాను కాల్చుకుని ఆత్మహత్య చేసుకున్న వైసీపీ నేత శివప్రసాదరెడ్డి పెనగలూరు మండల పరిషత్ అధ్యక్షుడి రేసులో ఉన్నారు.