మాజీ మంత్రి వైఎస్ వివేకానందరెడ్డి హత్య కేసులో సీబీఐ అధికారులు అరెస్టు చేసిన ఆయన సోదరుడు వైఎస్ భాస్కరరెడ్డికి కోర్టు రిమాండ్ విధించింది. దీంతో ఆయనను అధికారుల చంచల్ గూడ జైలుకు తరలించారు. తమకు పది రోజుల కస్టడీ విచారణకు అనుమతి ఇవ్వాలని కోరుతూ సీబీఐ పిటిషన్ దాఖలు చేసింది. ఇంకా ఈ హత్య కేసులో విచారించాల్సిన ఉందని, అందుకు భాస్కరరెడ్డిని తమ కస్టడీకి పది రోజుల పాటు అప్పగించాలని సీబీఐ తమ పిటిషన్ లో కోరింది.
అంతకు ముందు వైఎస్ భాస్కరరెడ్డిని పులివెందుల నుండి హైదరాబాద్ కు తీసుకువచ్చిన సీబీఐ అధికారులు ముందుగా ఉస్మానియా ఆసుపత్రిలో వైద్య పరీక్షలు చేయించారు. భాస్కరరెడ్డి కి బీపీ లెవల్స్ పెరగడంతో కొద్ది సేపు వైద్యులు అబ్జర్వేషన్ లో ఉంచారు. మందులు వాడాలని సూచించారు. కొద్దిసేపు అబ్జర్వేషన్ లో ఉంచిన వైద్యులు ఆ తర్వాత ఆయన ఆరోగ్య పరిస్థితి నిలకడగానే ఉందని తెలియజేయడంతో సీబీఐ అధికారులు ఆయనను తరలించి న్యాయమూర్తి ముందు ప్రవేశపెట్టారు. భాస్కరరెడ్డికి 14 రోజుల రిమాండ్ విధించారు. న్యాయమూర్తి ఆదేశాలతో ఆయనను చంచల్ గూడ జైలుకు తరలించారు. భాస్కరరెడ్డి రిమాండ్ రిపోర్టులో సీబీఐ కీలక అంశాలను ప్రస్తావించింది. పది పేజీల రిమాండ్ రిపోర్టును సీబీఐ కోర్టుకు సమర్పించింది.
వైఎస్ వివేకా హత్య కేసులో భాస్కరరెడ్డి పాత్ర కీలకమని సీబీఐ అభియోగం మోపింది. హత్యకు ముందు, తర్వాత నిందితులు భాస్కరరెడ్డి ఇంట్లో ఉన్నారనీ, దేవిరెడ్డి శివశంకర్ రెడ్డి, వైఎస్ భాస్కరరెడ్డి కలిసి పథకం ప్రకారమే వివేకాను హత్య చేయించారని రిమాండ్ రిపోర్టులో సీబీఐ ప్రస్తావించింది. సాక్షాలు తారుమారు చేయడంలో కీలక పాత్ర పోషించారని తెలిపింది. విచారణకు భాస్కరరెడ్డి సహకరించడం లేదనీ, ఆయన పారిపోయే అవకాశం ఉందని అరెస్టు చేశామని పేర్కొంది. కీలక సాక్షులను ప్రభావితం చేసే అవకాశం ఉందనే అరెస్టు చేశామని సీబీఐ తెలిపింది.
భాస్కరరెడ్డి అరెస్టు నేపథ్యంలో పులివెందుల్లో నిరసన ర్యాలీలు నిర్వహించారు. వైసీపీ నేతల పెద్ద సంఖ్యలో నల్లబ్యాడ్జీలు ధరించి శాంతి యుత నిరసన కార్యక్రమాలను నిర్వహించారు. వ్యాపార వాణిజ్య సంస్థలను స్వచ్చందంగా మూసి వేసి నిరసన కార్యక్రమానికి మద్దతు తెలియజేశారు. సీబీఐ ఏకపక్షంగా విచారణ జరిపి అన్యాయంగా భాస్కరరెడ్డిని అరెస్టు చేశారని అవినాష్ రెడ్డి అనుచరులు పేర్కొన్నారు.
రోడ్డు ప్రమాదంలో ఏపి మాజీ ఎమ్మెల్యే దుర్మరణం
