అట్టహాసంగా ప్రారంభమైన వైఎస్ఆర్ సీపీ ప్లీనరీ..వేదికపై జగన్ తో తల్లి విజయమ్మ

వైఎస్ఆర్ సీపీ ప్లీనరీ సమావేశాలు అట్టహాసంగా ప్రారంభమైయ్యాయి. తొలుత పార్టీ గౌరవాధ్యక్షురాలు వైఎస్ విజయమ్మ, పార్టీ అధ్యక్షుడు, సీఎం వైఎస్ జగన్మోహనరెడ్డి ప్లీనరీ సమావేశాలను ప్రారంభించారు. ఇడుపులపాయలో వైఎస్ఆర్ ఘాట్ వద్ద నివాళులర్పించి, ప్రార్ధనల అనంతరం విజయమ్మతో కలిసి సీఎం జగన్ విమానంలో గన్నవరం విమానాశ్రయానికి చేరుకున్నారు. అక్కడ తాడేపల్లి నివాసానికి చేరుకున్నారు. తదుపరి విజయమ్మతో కలిసి జగన్ ప్లీనరీ వద్దకు చేరుకున్నారు. ముందుగా జగన్ పార్టీ పతకాన్ని ఆవిష్కరించి ప్లీనరీ సమావేశాలను ప్రారంభించారు. జోహార్ వైఎస్ఆర్.. జై జగన్.. జై వైఎస్ఆర్ సీపీ నినాదాలతో ప్లీనరీ ప్రాంగణం మారుమోగింది. ప్లీనరీకి అన్ని జిల్లాల నుండి పెద్ద సంఖ్యలో నాయకులు, కార్యకర్తలు తరలివచ్చారు. రాష్ట్రంలో వివిధ ప్రాంతాల నుండి కార్యకర్తల సౌలభ్యం కోసం ఆర్టీసీ ప్రత్యేక బస్సులను ఏర్పాటు చేసింది.

నిన్న మొన్నటి వరకూ ప్లీనరీ సమావేశాలకు పార్టీ గౌరవాధ్యక్షురాలు  వైఎస్ విజయమ్మ హజరు అవుతారా లేదా అన్న సందేహాలతో ప్రతిపక్ష పార్టీ నేతలు విమర్శలు సంధిస్తున్నారు. ఈ తరుణంలో ఆమె ప్లీనరీ సమావేశాలకు తనయుడుతో కలిసి పాల్గొనడంతో విమర్శకులకు చెక్ పెట్టినట్లు అయ్యింది. కాగా పార్టీ అధినేత జగన్ కీలక ప్రసంగం చేయనున్నారు. మూడేళ్ల పాలన, భవిష్యత్తు ప్రణాళికను ప్రజల ముందు ఉంచనున్నారు. ప్లీనరీ సమావేశాల్లో రెండవ రోజైన శనివారం పార్టీ అధినేత జగన్.. రాబోయే ఎన్నికలకు సంబంధించి సుమారు 50కి పైగా నియోజకవర్గాల అభ్యర్ధులను ప్రకటిస్తారని వార్తలు వినబడుతున్నాయి.