AP Cabinet : ప్రతిపక్షాలు.. మీడియాలు.. సోషల్ మీడియాలు అనుకుంటాయి గానీ… సీఎం జగన్ కి అన్ని విషయాల్లో ఒక క్లారిటీ ఉంటుంది..! అది తప్పయినా, ఒప్పయినా.. తాను అనుకున్నది జరిగినా, జరగకపోయినా చివరి వరకు ప్రయత్నం చేయడం ఆయన ప్రత్యేకత..! అందుకే మంత్రివర్గ కూర్పులో కూడా ఎవరు ఏమనుకున్నా.., ఎవరిపై ఎన్ని వచ్చినా తాను అనుకున్న సమయానికే మార్పులు చేయబోతున్నారు. ఈ ఏడాది ఆగష్టు వరకు మంత్రివర్గంలో మార్పులు ఉండే అవకాశమే లేదు. అప్పటికల్లా పరిషత్ ఎన్నికలు కూడా పూర్తవుతాయి కాబట్టి… అన్ని ఫలితాలు మేళవించుకుని కీలక మార్పులు చేసి, తనతో యువ టీమ్ ని సిద్ధం చేసేలా సీఎం జగన్ కసరత్తులు చేసినట్టు తెలుస్తుంది..!!
AP Cabinet : ఈ మంత్రులకు ముప్పు తప్పదు..!?
మంత్రివర్గంలో ప్రస్తుతం ఉన్న మంత్రుల్లో 90 శాతం మంది అంటే… 23 మంది మంత్రులు తొలగింపు తప్పదు అని సీఎం జగన్ మొదట్లోనే చెప్పేసారు. ఎవరికీ వాళ్ళు జాగ్రత్తగా పని చేసుకోవాలని సున్నితంగా హెచ్చరించారు. సో.. ఆగస్ట్ తర్వాత ఈ 23 మందిని తీసేసి.., కొత్తగా అదే సంఖ్యలో తీసుకోనున్నారు అనేది ఒక స్పష్టమైన అంశం. తీసేసే వారిలో ఎవరి పేర్లు ముందుంటాయి అనేది చూసుకుంటే…!
* కర్నూలు జిల్లాకు చెందిన ఒక మంత్రి పేరు మొదటి వరుసలో ఉంది. శాఖపై సబ్జెక్టు లేక, బయటకు ఏమి మాట్లాడలేక, కనీసం రాష్ట్రంలో ఎవరికీ తెలిసిన వ్యక్తిగానూ కాక… పైగా అవినీతి ఆరోపణలు, ఆధారాలు బయటకు రావడంతో ఈ మంత్రికి ముప్పు తప్పేలా లేదు అంటున్నారు.
* విశాఖ జిల్లాకు చెందిన ఓ మంత్రిపైనా వేటు తప్పదని సంకేతాలు వస్తున్నాయి. ఈయనపై అవినీతి ఆరోపణలతో పాటూ.., ప్రవర్తన, అధికారులతో మెదులుతున్న తీరుపై సీఎం కి అనేక ఫిర్యాదులు వెళ్లాయట. ఇటీవల జరిగిన గ్రేటర్ విశాఖ ఎన్నికల్లో కూడా మంత్రి నియోజకవర్గంలో ఫలితాలు తేడా కొట్టడంతో ఈయన్ను తప్పించడమే బెటర్ అని సీఎం జగన్ భావిస్తున్నట్టు తెలిసింది.
* పశ్చిమ గోదావరి జిల్లాలో ముగ్గురు మంత్రులు ఉండగా.. ఇద్దర్ని తొలగించడం ఖాయమేనని సమాచారం. కృష్ణ జిల్లాలో ముగ్గురు మంత్రులకు గానూ ఇద్దర్ని తొలగించడం ఖాయమని ప్రచారం జరుగుతుంది. ఇక్కడి వరకు మనం చెప్పుకున్న జాబితా కచ్చితంగా తొలగిస్తారు అని అనుకుంటున్నవి. ఇవి కాకుండా రెండున్నరేళ్లు అయింది కాబట్టి… తప్పక తొలగించాలి, మార్పులు చేయాలి అనుకుంటే ఇంకొన్ని తీసివేతలు తప్పకపోవచ్చు.
ప్రవర్తన.., పెరఫార్మెన్సు.. పరిశీలనా..!!
జగన్ క్షుణ్ణంగా పరిశీలిస్తారు. తన మంత్రులు వివిధ అంశాలను డీల్ చేస్తున్న తీరుని పరిశీలించి ఒక అభిప్రాయానికి వస్తారు. కొందరు మంత్రులు పని చేయకుండా కేవలం “ప్రెస్ మీట్లు పెట్టి జగన్నామస్మరణతో గడిపేస్తున్నారు. అసందర్భంగానూ సీఎం జగన్ ని పొగడడం.., చంద్రబాబుని తిట్టడం చేస్తున్నారు.. కొందరు పై పైన అనేక మాటలు చెప్తున్నప్పటికీ… నియోజకవర్గంలో బోలెడు అపఖ్యాతి మూటగట్టుకుంటున్నారు.. ఇలా మంత్రుల ప్రవర్తన, పరివర్తన, పెర్ఫార్మన్స్ అన్నిటినీ పరిశీలిస్తున్న జగన్ ఇప్పటికే కొందరి విషయంలో ఒక స్పష్టతకు వచ్చేసినట్టు తెలిసింది. ఇంకా సమయం ఉంది కాబట్టి మిగిలిన కొద్దీ మంత్రి జాబితా కూడా సిద్ధం చేసుకుని ఆగస్ట్ నాటికి మార్పుల కసరత్తు మొదలవనున్నట్టు చెప్పుకోవచ్చు..!!
