ఈ కోర్టులేమిటో జగన్ పై పగ పట్టేసినట్టున్నాయి..! ఈ జగనేమిటో అధికారులు, పోలీసులపై పగ పట్టేసినట్టున్నాడు..! ఈ అధికారులేమిటో సహజ సిద్ధాంతాలపై పగ పట్టేసినట్టున్నారు. ఈ పోలీసులేమిటో ప్రతిపక్షాలపై పగ పట్టేసినట్టున్నారు. ఇక్కడ అన్నీ (కోర్టులు, జగన్, అధికారులు, పోలీసులు) పగతో పొగ రాజేస్తున్నారు. పడగ విప్పుతున్నారు. ఎన్నైనా, ఏమైనా కోర్టులకు పగేముంటుందిలే కానీ…, వాటిలో వాదనలకే పగ, పొగ ఉంటాయి. పగ పట్టిన, పొగ పెట్టిన వాదనలు పైచేయి సాధిస్తే, జగన్ బృందం వాదనలు కిందికి దిగి ముడుచుకుంటున్నాయి. అందుకే ఈ మధ్య ప్రతి విషయంలోనూ జగన్ బృందం అంటే ప్రభుత్వ అధికారులు, పోలీసులు కోర్టుల చేతిలో చివాట్లు తింటున్నారు. గ్రామ, వార్డు సచివాలయాలకు వైసీపీ రంగుల వ్యవహారం నుండి నిన్న చంద్రబాబుని విశాఖలో పోలీసులు అడ్డుకుని 151 నోటీసు కింద అరెస్టు చేసిన వరకు అన్ని వ్యవహారాల్లోనూ ప్రభుత్వ వాదనలు బెడిసికొడుతున్నాయి. అసలు ఈ వాదనల్లో అసమర్థత ఉందా…? నిర్ణయాల్లోనే అసంబద్ధత ఉందా అనేది ప్రభుత్వ పెద్దలు తమకు తామే విశ్లేషించుకోవాలి.
మనిసన్నాక కొన్ని లక్షణాలు, అవ లక్షణాలు సహజమే. అందులోకి రాజకీయం అంటే ఆ రెండు లక్షణాలు అవపోషణ చేసుకుని మరీ ఉండాలి. సమయం కొద్దీ బయటకు తీయాలి. ఒక పనికి, ఒక నిర్ణయానికి సరైన కారణం ముందే సిద్ధం చేసుకుని అమలు చేయాలి. జవాబుదారీగా ఉండాలి. లేకుంటే తిప్పలు తప్పవు. తప్పులు చేసిన దోషిలా ఉండాల్సి వస్తుంది. సర్ది చెప్పుకునే వాదన ఉండాలి. ఎదుటి వారి ప్రతి ప్రశ్నను ముందే ఊహించి సమాధానం సిద్ధం చేసుకోవాల్సిన సమయం ఇప్పుడు నడుస్తుంది. కానీ వైసీపీ ప్రభుత్వ నిర్ణయాలను సమర్ధించడంలో, అంతర సదుద్దేశాన్ని సక్రమంగా చెప్పడంలో, సమ్మతమైన వాదనలు వినిపించడంలో ఇప్పుడు జగన్ ప్రభుత్వం ఇబ్బందులు స్పష్టంగా కనిపిస్తున్నాయి. అందుకే వరుసగా హైకోర్టులో ఈ పరిస్థితి వస్తుంది. చివాట్లు ఎదురవుతున్నాయి. రాజకీయంగా జాతీయ స్థాయిలో పేరున్న, రాష్ట్రంలో తిరుగులేని నేతగా ఉన్న జగన్ ముఖ్యమంత్రి అయిన తర్వాత ఆయన నిర్ణయాలు వివాదాస్పదంగా ఉంటున్నాయి. ఆయన పరిపాలనా దూకుడు, సుదీర్ఘ ఆలోచనలు, భావి అవసరాల దృష్ట్యా తీసుకున్న నిర్ణయాలు అటువంటివి. ప్రతిపక్షాలు వాటిని సవాలు చేయడం సహజమే. అయితే జగన్ నిర్ణయాలను కోర్టుల్లో సమర్ధించేలా, సరైన వాదనలు వినిపించట్లేదు. ఈ ఫలితమే వైఫల్యాలు.
వరుసగా హైకోర్టులో షాక్ ల మీద షాక్ లు వస్తున్నాయి. ఉత్తరాంధ్రలో పర్యటనకు చంద్రబాబుకి పోలీసులు అనుమతిని ఇచ్చారు. కానీ ఆయన వచ్చిన తర్వాత 151 నోటీసులు ఇచ్చి, రాత్రికి తిరిగి పంపించేశారు. దీన్ని సమర్ధించుకోవడంలో డొల్ల తనంతో కోర్టులో దోషులుగా నిలబడ్డారు. ఇదో తాజా అపవాదు. దీనికి ముందు రోజునే రాజధాని ప్రాంత భూముల్లో ఇతర ప్రాంతాల వారికి పట్టాలు ఇవ్వవద్దని కోర్టు తేల్చి చెప్పింది. ఇదొక గొంతులో వెలక్కాయ. దీని కంటే ముందు ప్రభుత్వ కార్యాలయాల తరలింపు, గ్రామ సచివాలయాలకు వైసీపీ రంగులు వేయడం, హైకోర్టు భవనం తరలింపు ఇలా ఎన్నో అంశాల్లో కోర్టులు ప్రభుత్వ అధికారులు, పోలీసులకు చువాట్లు పెడుతున్నాయి. ముఖ్యంగా ఈ విచారణలు సందర్భంగా న్యాయమూర్తులు కొన్ని తీవ్ర వ్యాఖ్యలు చేయడం జగన్ అండ్ బృందం పునరాలోచించుకివాల్సిన అంశం. జగన్ చుట్టూ వందల మంది సివిల్ సర్వీసెస్ అధికారులు, న్యాయ పట్టాలు పొందిన నిపుణులు.., పోలీసుల్లో చట్టాలు ఆరితేరిన వారు ఉంటారు. వారితో సంప్రదించి, సరైన నిర్ణయం అమలు చేసి, దాన్ని సమర్ధించుకోకుంటే ఇటువంటి అప్రతిష్టలు కొనసాగుతూనే ఉంటాయి. పిటిషన్లు పెరుగుతూనే ఉంటాయి. అధికారులు, పోలీసులు వాటి చుట్టూ తిరగడానికి, సమయం వెచ్చించడానికి బోలెడు మానసిక శ్రమ కూడా తప్పదు. వైసీపీకి రాజకీయంగా కాస్త చులకన తప్పదు. ప్రతిపక్షాలకు ఇవి ఆయుధాలుగా మారక తప్పదు. ఎటువంటి అంశాలను అయినా కోర్టులో బలంగా వాదించి, సమర్ధించగల నిపుణత ప్రస్తుతం కొరవడింది. అది వస్తేనే ఈ సమస్యకు శాశ్వత పరిష్కారం దొరికేది.
శ్రీనివాస్ మానెం
