Pawan Kalyan : టిడిపి సీనియర్ ఎమ్మెల్యే గంటా శ్రీనివాసరావు విశాఖ ఉక్కు ప్రైవేటీకరణ విషయాన్ని ఎంత సీరియస్ గా తీసుకున్నారు అన్నది అందరికీ తెలిసిందే. ఏకంగా రాజీనామా చేసి ఒక్కసారిగా రాష్ట్ర రాజకీయాల్లో ప్రకంపనలు సృష్టించారు. అసలు అతని ప్లాన్ ఏమిటో ఎవరికీ అర్థం కాని సమయంలో ఒక్కసారిగా జనసేన అధినేత పవన్ కళ్యాణ్ ను అతను టార్గెట్ చేయడం విశేషం.
టిడిపి ఎమ్మెల్యే గంటా శ్రీనివాసరావు…. జనసేన అధినేత పవన్ కళ్యాణ్ ను బలవంతంగా బరిలోకి లాగుతున్నారు. తాజాగా ఆయన చేసిన వ్యాఖ్యలు చూస్తుంటే అలాగే ఉంది. కేంద్రం తీసుకున్న నిర్ణయానికి వ్యతిరేకంగా పవన్కళ్యాణ్ బరిలోకి దిగాలని ఆయన డిమాండ్ చేశారు. ఏకంగా బిజెపి పార్టీ ని వదిలేసి విడిగా ఆందోళనకు దిగాలని సూచించారు. ఒక్క పవన్ కళ్యాణ్ నే కాకుండా సినీ పరిశ్రమ మొత్తం బరిలోకి దిగాలని అన్నారు. అయితే సినీ పరిశ్రమ కేవలం ముసుగు అని… అతను మాత్రం నేరుగా పవన్కళ్యాణ్ ను టార్గెట్ చేస్తున్నారని చెబుతున్నారు.
విషయం ఏమిటంటే…. కేంద్ర ప్రభుత్వం జగన్ దగ్గర నుండి లేఖ వచ్చిన తర్వాత కూడా విశాఖ ప్రైవేటీకరణ పై ఎలాంటి నిర్ణయం తీసుకోలేదు. ఇలాంటి సమయంలో పవన్ కళ్యాణ్ ఒకసారి ఢిల్లీకి వెళ్లి వచ్చారు కానీ రిక్తహస్తాల తోనే వెనుదిరిగారు. అయితే ఒక్కసారిగా ఇదే అదను అన్నట్లు గంటా శ్రీనివాసరావు ఇటు బిజెపి అటు పవన్ కళ్యాణ్ కి తన అస్త్రాలు ఎక్కుపెట్టారు. పైగా తను ఎమ్మెల్యే పదవికి రాజీనామా చేసి ఈ మాటలు మాట్లాడుతున్నారు కాబట్టి అతని వ్యాఖ్యలకు ఇంకాస్త విలువ ఉంటుంది. పైగా పార్టీ లైన్ ను కాదని చంద్రబాబు నాయుడు ఆదేశాలను కూడా దిక్కరించి మరీ గంటా ఆందోళనల్లో పాల్గొంటున్నారు. ఇప్పటిదాకా అంతా వ్యక్తిగతంగా ఉంది కానీ ఒక్కసారిగా పవన్ కళ్యాణ్ పేరును ప్రస్తావించడం అతను ఖచ్చితంగా వ్యతిరేకించాలని డిమాండ్ చేయడం చూస్తుంటే అతని వెనుక ఏదో బలమైన పార్టీ అజెండా ఉందని విశ్లేషకులు అభిప్రాయపడుతున్నారు.
ప్రస్తుతానికి అయితే బిజెపి నేతలు కానీ లేకపోతే మిత్రపక్షం జనసేన కానీ అతని మాటల పై స్పందించలేదు. కేంద్రం తీసుకునే నిర్ణయానికి సహకరించలేక, బహిరంగంగా వ్యతిరేకించలేక బిజెపి–జనసేన లీడర్లు అవస్థలు పడుతుంటే మధ్యలో గంటా ఇటువంటి వ్యాఖ్యలు చేయడం వారి పరిస్థితిని మరింత క్లిష్టతరం చేసింది. దీని వెనుక అధికార పార్టీ ఉందా లేదా టీడీపీ డబుల్ గేమ్ ఆడుతుందా అన్న విషయం పక్కన పెడితే ఇప్పటివరకు పవన్ ఒక్కసారి కూడా రోడ్డు మీదకు వచ్చి ఉక్కు ఫ్యాక్టరీ కి మద్దతు ఇవ్వలేదు. అప్పుడు టీడీపీతో…. ఇపుడు బీజేపీ చేరటం వల్ల పాపం పవన్ ప్రశ్నించటమే మరచిపోయారు అన్న విమర్శలకు అతని దగ్గర సమాధానం ఉందా అన్నదే ఇప్పుడు అసలైన ప్రశ్న.