పార్టీ జిల్లా అధ్యక్షుడిగా… పార్టీ రాష్ట్రం మొత్తం తెలిసిన.. మంత్రిగా పని చేసిన దేవినేని ఉమాకి అదే పదవి.., పార్టీలో ఇప్పుడిప్పుడే ఎదుగుతున్న పంచుమర్తి అనురాధకి అదే పదవి కల్పించారు.. పార్టీలో అసలు ఎవ్వరికీ మద్దిపాటి వెంకటరాజుకి అదే పదవి దక్కింది..!! అంటే దేవినేని ఉమాకు దించినట్టా..? కాదా..!!?
రెండు సార్లు ఎమ్మెల్యేగా పని చేసి.. ప్రతిపక్షంలో ఉండగా పార్టీని జిల్లాలో నిలబెట్టి.., అధికారంలోకి వచ్చాక మంత్రి పదవి ఆశించి పార్టీకి కీలకంగా పని చేసిన చింతమనేని ప్రభాకర్ కి.., పార్టీలో పక్క నియోజకవర్గం వాళ్లకు కూడా తెలియని.. సాదాసీదా నాయకులకు ఒకేస్థాయి పదవులు ఇచ్చారు. మరి చింతమనేనిని దించినట్టా..? కాదా..!?
ఎప్పుడో 2014 ఎన్నికలకు ముందు పార్టీలో చేరి.. పూర్తిగా పార్టీలో యాక్టీవ్ కూడా అవ్వని నల్లారి కిషోర్ కుమార్ రెడ్డికి జాతీయ కార్యదర్శిగా పదవి కట్టబెట్టారు..! అంటే పైకి ఎక్కించినట్టా..? కాదా..!?
2019 ఎన్నికలకు ముందు పార్టీలో చేరిన గిద్దలూరు మాజీ ఎమ్మెల్యే సాయికల్పనారెడ్డికి.. తాతల కాలం నుండి పార్టీలో ఉంటూ.., పార్టీ జిల్లా అధ్యక్షుడుగా కూడా పని చేసిన ఒంగోలు మాజీ ఎమ్మెల్యే దామచర్ల జనార్దన్ కి ఒకే స్థాయి పదవి ఇచ్చారు. అంటే దామాచార్లను దించినట్టా కాదా..? సాయికల్పనను పైకి ఎక్కించినట్టా..? కాదా..!?
* రాష్ట్ర వ్యాప్తంగా పేరున్న.. జిల్లాలో పట్టున్న పరిటాల వారసుడు శ్రీరామ్ కి అధికార ప్రతినిధి ఇచ్చారు. అసలు పార్టీలో ఎవరికీ తెలియని సయెద్ రఫీ, సప్తగిరి ప్రసాద్ కి కూడా అదే పదవి ఇచ్చారు. అంటే ఇక్కడ తొక్కినట్టా..? కాదా..!?
సో.. టీడీపీ రాష్ట్ర కమిటీల్లో చంద్రబాబు పక్కా ప్రణాళికలు ఉన్నాయి. పక్క పార్టీల కాపీలున్నాయి. పక్కలో బల్లాలను పక్కన పెట్టారు. కొత్త వాళ్ళను పక్కకు తెచ్చుకున్నారు. బీసీల పాటా పాడారు. కమ్మలకు కొమ్ములు కాస్త దించారు. కానీ ఊరికే దించలేదు.
ఎందుకు దించారో తెలుసా..!?
దేవినేని ఉమాపై ఎప్పటి నుండో ఆ జిల్లాలో ఆరోపణలున్నాయి. పార్టీ జిల్లా అధ్యక్షుడుగా పని చేసినప్పటి నుండి ఏకపక్షంగా వ్యవహరిస్తున్నారని.., కొందరు సీనియర్ నాయకులను లెక్క చేయడం లేదని ఆరోపణలు ఉన్నాయి. పైగా గత ప్రభుత్వంలో నీటి మంత్రిగా నీతి కబుర్లు చెప్తూ.., అవినీతి బాగానే చేశారనే బ్యాడ్ టాక్ ఉంది. అందుకే అతన్ని దించారు.
* ఇక చింతమనేని అంటే నోరు అదుపులో ఉండదు. ఎదురుగా గ్రామా కార్యదర్శి ఉన్నా.., సీఎం ఉన్నా ఒకే తరహాలో మాటలు వస్తుంటాయి. కార్యకర్తలు అంటే మమకారం ఉన్నప్పటికీ విలువ ఉండదు. సొంత మనుషులంటే చులకన ఉంటుంది. పైగా బోలెడంత బ్యాడ్ నేమ్ ఉంది. అందుకే ఏదో ఒక పదవి ఇచ్చేస్తే పోతుంది అనే లెక్కలో ఇచ్చేసారు.
* ఇక దామచర్ల జనార్దన్ పరిస్థితి కూడా అంతే. పార్టీకి జిల్లా అధ్యక్షుడిగా తొమ్మిదేళ్లు పని చేసారు. పార్టీని సమన్వయం చేయడంలో ఎప్పుడూ విమర్శలు ఉండేవి. సీనియర్లతో, జిల్లాలోనే సొంత పార్టీ ఎమ్మెల్యేలతో కూడా పొసిగేది కాదు. ఆయన కారణంగానే పార్టీ నుండి కొందరు బయటకు వెళ్లిపోయారనే వాదనలు ఉన్నాయి. అందుకే ఈ భారాన్ని దించుకుంటే క్రమంలో దించేశారు. సో… ఈ సారి కమిటీల్లో మాత్రం ఇలా కానిచ్చేశారు..!!