రాష్ట్రంలో రాజధాని రగడ (రాజకీయం) మొదలై ఏడాది అవుతుంది..! పాలనా వికేంద్రీకరణ పేరుతో సీఎం జగన్ మూడు రాజధానుల నిర్ణయం తీసుకుని ఏడాది అవుతుంది..! ఇన్నాళ్లులో ఏడాది కాలం వృథా తప్పితే పెద్దగా రాష్ట్రం గుర్తుంచుకునే మార్పులు ఏమి లేవు. ఇప్పటికీ దీనిపై తేల్చేయకపోతే ఇక సీఎం నిర్ణయానికి, ఆశయానికి విలువ ఉండదు..!! ఏడాదైన తరుణంలో బీజేపీ మాటలు ఎన్నో మారాయి. తాజాగా సోము మరింత ముదిరేలా మాట్లాడారు. మరోవైపు కోర్టుల్లో విచారణ కీలక దశలో ఉంది..! అందుకే ఇవన్నీ కాదు కానీ..- “నా నిర్ణయం ఇది. మీ కథ ఏమిటి..!?” అనేది స్పష్టత కోసమే జగన్ ఢిల్లీ టూరు అనేది “న్యూస్ ఆర్బిట్” ప్రత్యేక సోర్సుల ద్వారా తెలిసింది. దీనిలో కొన్ని లెక్కలు, రహస్యాలు, రాజీ సూత్రాలు ఉన్నాయి..! అవేమిటో చూద్దాం పదండి..!!
సోము ఆకస్మికమా..? ఆంతర్యమా..!?
రాజధాని విషయంలో బీజేపీ మొన్నటి వరకు ఒక స్టాండ్ లో లేదు. రకరకాల వేదికలపై, రకరకాల మాటలతో గడిపేసింది. కానీ తొలిసారిగా మొన్న సోము వీర్రాజు “నేను మోడీ మనిషిగా చెప్తున్నాను. రాజధాని అమరావతిలోని ఉంటుంది. వికేంద్రీకరణ జరగదు. బీజేపీ అధికారంలోకి వస్తే అమరావతికి ప్రత్యేక ప్యాకేజీ ఇచ్చి అభివృద్ధి చేస్తాం” అన్నారు. ఇవి ఆకస్మికంగా మాట్లాడారా..? ఆంతర్యంతో మాట్లాడారా..? అనేది కీలకం. రాష్ట్రంలో బీజేపీ పెద్ద ఇలా మాట్లాడారు అంటే కచ్చితంగా అది రాజధాని అంశంపై బీజేపీ పెద్దల్లో ఏదో కదలికలు జరుగుతున్నట్టే. అందుకే అవేమిటో తేల్చేయడానికి, తెలుసుకోడానికి సీఎం జగన్ ఢిల్లీకి వెళ్లారు అనేది ఒకటో కారణం..!!
ఏడాదిలో ఎన్నో అవరోధాలు..!!
రాజధాని గొడవ మొదలై ఏడాది అవుతుంది. సీఎం మూడు రాజధానుల నిర్ణయాన్ని ప్రకటించిన రోజు చాలా మద్దతు ఉంది. దేశం మొత్తం ఇటు చూసింది. రాష్ట్రంలో కూడా తటస్థులు చాలా వరకు మంచిదే అనుకున్నారు. అందుకే నాడు కృష్ణా, గుంటూరు జిల్లాల్లో చంద్రబాబు పర్యటించి.., అమరావతి అనుకూల ఉద్యమం కోసం జోలె పడితే పెద్దగా స్పందన లేదు. కానీ ఈ ఏడాది వ్యవధిలో రాష్ట్రంలో మార్పులు వచ్చాయి. ప్రస్తుతం రాజధానులపై ఎవరికీ ఆసక్తి లేదు, ఆలోచనలో మార్పులు వచ్చాయి. ఓ వైపు కరోనా, మరోవైపు వరదలు, పంట నష్టాలు, రాష్ట్రానికి ఆర్ధిక ఇబ్బందులు, న్యాయవ్యవస్థతో వివాదాలు, పాలనలో అనేక కొత్త సమస్యలు రావడంతో ప్రజల్లో రాజధాని పట్ల మిశ్రమ స్పందన ఉంది. అంటే ఏడాది కిందట ఉన్న మద్దతు మాత్రం ఇప్పుడు లేదు. నాటి నుండీ నాన్చుతున్న బీజేపీ పెద్దలు రాజధాని మార్పు విషయంలో పూర్తిగా ఏమి చెప్పలేదు. జగన్ మాత్రం బీజేపీ పెద్దలు, కేంద్రం శతశాతం మద్దతిస్తుంది అనే ఆశతో ఉన్నారు. ఇప్పుడు అది తేల్చేయాల్సిన సమయం వచ్చింది. అందుకే సీఎం ఢిల్లీ పర్యటన వెనుక బోలెడంత మ్యాటర్ ఉంది.
స్నేహ హస్తం ఇస్తే ఒకలా..! ఇవ్వకపోతే మరోలా..!!
ఇప్పుడు జగన్ కి ఉన్న అతి పెద్ద టాస్క్ మూడు రాజధానుల అంశమే. అందుకే ఢిల్లీలో రేపటితో ఒక స్పష్టతకు వచ్చేస్తారు. బీజేపీ మద్దతు ఉంటె.., వ్యవస్థల ద్వారా తన నిర్ణయానికి అనుకూల నిర్ణయాలు రావచ్చు. లేకపోతే వ్యతిరేక నిర్ణయాలు రావచ్చు. అది జగన్ కి బాగా తెలుసు. అందుకే మొన్నటి సోము మాటలతో బాగా మండి రాజకీయంగా ఒక క్లారిటీ తీసుకోడానికి ఢిల్లీ వెళ్లారనేది ఒక అంశం అయితే.., కేంద్రంతో స్నేహంగానే ఉంటున్నారు. కానీ మొన్న రైతు ఉద్యమం భారత్ బందుకు అనూహ్యంగా మద్దతు ఇవ్వాల్సి వచ్చింది. అలా మద్దతిచ్చిన కేసీఆర్ ఢిల్లీ వెళ్లారు. మద్దతిచ్చిన జగన్ కూడా ఢిల్లీ వెళ్లారు. సో.. ఇదీ ఆలోచించాల్సిన పాయింటే..! ఇది రెండో అంశంగా ఉంటుంది. ఇవి కాకుండా పోలవరం ప్రాజెక్టుని నిన్న సందర్శించిన సీఎం జగన్ దానికి నిధుల విషయంలో అధికారికంగా కాకుండా రాజకీయంగా లాబీయింగ్ చేయాల్సిన అవసరాన్ని గుర్తించారు. అధికారికంగా అయితే ఎవరు హక్కులు, తప్పులు, లెక్కలు, రూల్స్ చెప్పుకుంటున్నారు. అలా కాకుండా పోలవరానికి కేంద్రం నిధులివ్వకపోతే తనకు జరిగే నష్టం.., బీజేపీకి కూడా జరిగే నష్టాన్ని జగన్ వివరిస్తారు. సో.., ఇలా రాష్ట్రంలోకి కొన్ని కీలక అంశాలపై రాజకీయంగా ఒక స్పష్టత కోసం జగన్ ఢిల్లీ వెళ్లినట్టు చెప్పుకోవచ్చు. అందుకే రాజధాని ఒకటా..? మూడా..? అనేది రాజకీయంగా రేపటితో తేలిపోవచ్చు..!?
