Elections : తమిళనాడులో ఎన్నికలు అంటే అటు డీఎంకే అయినా గెలవాలి లేదా అన్నాడీఎంకే అయినా గెలవాలి. అయితే ఈ రెండు పెద్ద పార్టీలు ఇప్పుడు అనూహ్యంగా వణికిపోతున్న పరిస్థితి తమిళనాడురాష్ట్రంలో కనిపిస్తోంది. అధికార అన్నాడీఎంకే పార్టీ సైతం రాష్ట్రంలో చిన్నాచితకా పార్టీలకు భయపడే పరిస్థితి నెలకొంది. చిన్నచితకా పార్టీలు అంటే కాంగ్రెస్, బిజెపిలు అనుకున్నేరు… అక్కడే మీరు పప్పు లో కాలేసినట్లు..!
ఎన్ని పార్టీలో….
ఇంతకీ తమిళనాడులో అసలు ఎన్ని పార్టీలు ఉన్నాయో తెలుసా..? సరిగ్గా చెప్పాలి అంటే ఎవరైనా కొద్దిసేపు ఆలోచించాల్సిందే. డీఎండీకే, ఎండికే, పీఎంకే, ఏఎంఎంకే, ఐజెకే, ఎస్ఎంకే లాంటి పేర్లతో ప్రాంతీయ పార్టీలు ఎన్నో ఉన్నాయి. కొన్ని జిల్లాలకు లేదా రాష్ట్రం లో ఒక ప్రాంతానికి మాత్రమే పరిమితమైన ఈ చిన్న పార్టీల వల్ల పెద్ద పార్టీలైన అన్నాడీఎంకే డీఎంకే లు వణికిపోతున్నాయి. ఈ ప్రాంతీయ పార్టీలన్నీ కలిసి ఎక్కడ తమ అభ్యర్థుల విజయావకాశాలను దెబ్బతీస్తాయి అన్నది వీరి బాధ. ఇవేమీ ఉత్తుత్తి ఊహాగానాలు కాదు. వారి వేసుకుంటున్న కచ్చితమైన లెక్కలు.
Elections : గతం గుర్తుతెచ్చుకుంటేనే….
2016 అసెంబ్లీ ఎన్నికల్లో అయినా 2019 పార్లమెంట్ ఎన్నికల్లో అయినా ఈ ప్రాంతీయ పార్టీలన్నీ రెండు పెద్ద పార్టీలను విపరీతంగా వణికించాయి. ఎన్నో చోట్ల స్వల్ప మెజారిటీ… అంటే ఒక మూడు నాలుగు వేల తో ఈ రెండు పార్టీలు చాలా నియోజకవర్గాల్లో బయటపడ్డాయి. 2019 ఎన్నికల్లో అయితే ఏకంగా అధికార పక్ష పార్టీ అయిన అన్నాడీఎంకే అభ్యర్థులు ఓడిపోవడం లో చిన్న పార్టీల ప్రభావం ఎక్కువ. అందుకే వారికి చాలా చోట్ల అంత పెద్ద మెజారిటీ కూడా రాలేదు. ఇప్పుడు కూడా అలాంటి పరిస్థితి ఉంటే ఫలితం తారుమారు అవుతుందని పెద్ద పార్టీలు భయపడుతున్నాయి. పైగా పార్టీలకి పెద్ద దిక్కులు అయిన కరుణానిధి, జయలలిత కూడా లేరాయె. వాళ్ళిద్దరు లేకుండా రాష్ట్రం లో జరుగుతున్న మొదటి ఎన్నికలు ఇవే కావడం విశేషం.
ప్రజలకు భలే అవకాశం…!
ఇక జయలలిత, కరుణానిధి లేకపోవడంతో ఈ ప్రాంతీయ పార్టీలకు మరింత బలం వచ్చినట్లు అయింది. ఈ మధ్య తమిళనాడులో జరుగుతున్న పరిణామాలు చూస్తుంటే ప్రాంతీయ పార్టీల వైపు ప్రజలు మొగ్గు చూపే అవకాశం ఉంది. కాబట్టి పూర్తిస్థాయి మెజార్టీ రావడం కోసం ఇప్పటికే పార్టీలు వరాల జల్లు కురిపించారు. అదీ కాకుండా అధికారంలోకి వచ్చిన తర్వాత కూడా ఎక్కడ తమ పీటం కదులుతుందో అన్న భయంతో ప్రాంతీయ పార్టీలను చేరదీయడం…. అలాగే వారి వెనుక ఉన్న ప్రజల బాగోగులు చూసుకోవడం కూడా నిశ్చయం అని చెప్పవచ్చు. అంతేకాకుండా ఇలా ప్రాంతీయపార్టీల ఎదుగుదల కూడా ప్రజాస్వామ్యానికి మంచిదే. పెద్ద పార్టీలు కూడా తమ రాజకీయాన్ని అదుపులో ఉంచుకుంటారు. మరి ఇటువంటి పరిస్థితి మరే ఇతర రాష్ట్రానికైనా భవిష్యత్తులో వస్తుందేమో చూడాలి.