Telangana Politics: తెలంగాణ రాజకీయాల్లో ఈటల రాజేందర్ ఎపిసోడ్ వేడి వేడిగానే ఉంది. నెల రోజుల కిందట మంత్రి పదవి నుండి బహిష్కరణకు గురైన ఈటల గడిచిన నెల రోజుల నుండి ప్రణాళికాబద్ధంగా వ్యూహాలు వేశారు. కేసీఆర్ పై యుద్ధానికి.. టీఆరెస్ ని దించడానికి అవసరమైన వ్యూహాన్ని సిద్ధం చేసుకుని ఈరోజు రాజీనామా చేశారు. వచ్చే ఎన్నికల నాటికి ఎట్టి పరిస్థితుల్లోనూ కేసీఆర్ మళ్ళీ అధికారంలోకి రాకూడదు అనేది ఈటల అతి పెద్ద లక్ష్యం. దీనిలో భాగంగా కేసీఆర్ వ్యతిరేకులను ఏకతాటిపైకి తెచ్చే మహత్తర కార్యక్రామానికి శ్రీకారం చుడుతూనే తన బలాన్ని పెంచుకునే పనిలో పడ్డారు. అందుకు మూడు దశల్లో మూడంచెల వ్యూహాన్ని అమలు చేయనున్నారు..
Telangana Politics: ఎమ్మెల్యేగా భార్యని పోటీలోకి..!?
ఈటల రాజేందర్ ఈరోజు తన ఎమ్మెల్యే పదవికి రాజీనామా చేశారు. హుజురాబాద్ నుండి వరుసగా అయిదుసార్లు గెలిచినా రాజేందర్ కి అక్కడి నుండి పోటీ చేసి గెలవడం పెద్ద కష్టమేమి కాదు. టీఆరెస్ మోసం చేసిందన్న సానుభూతితో ఆధిక్యత కూడా సాధించుకోగలరు. కానీ తాను కాకుండా తన భార్యని పోటీలో పెట్టి గెలిపించాలనేది ఈటల మొదటి వ్యూహం. బీజేపీలో చేరి ఆ పార్టీ టికెట్ తో హుజురాబాద్ లో తన భార్య గెలిస్తే టీఆరెస్ పై ఈటల సగం పై చేయి సాధించినట్టే. కేసీఆర్ తో సవాల్ లో నెగ్గినట్టే..
* ఆ తర్వాత దశలో తాను కేంద్ర ప్రభుత్వంలో భాగస్వామి కావాలని అనుకుంటున్నారు. బీజేపీలో చేరి రాజ్యసభ సీటు తీసుకుని, తద్వారా కేంద్రమంత్రి కావాలనేది ఈటల వ్యూహం. తెలంగాణాలో బలం పెంచుకునే క్రమంలో.. టీఆరెస్ పై పోరాడటానికి సిద్ధంగా ఉన్న ఈటల లాంటివారి అవసరం బీజేపీకి చాలానే ఉంది. 2023 ఎన్నికల్లో బీజేపీ గెలవాలంటే టీఆరెస్ ని ఇప్పటి నుండి బలహీనం చేయాలి. ఆ పార్టీలో మొదటి నుండి కార్యకర్తగా, నాయకుడిగా, ఉద్యమకారుడిగా, ఎమ్మెల్యేగా, మంత్రిగా, కేసీఆర్ కి అత్యంత సన్నిహితుడిగా ఉన్న ఈటల రాజేందర్ తో బీజేపీకి చాలా పని ఉంది. అందుకే ఇటు ఈటల – అటు బీజేపీ ఒక ప్రాధమిక అంగీకారానికి వచ్చాయని సమాచారం. హుజురాబాద్ లో తన భార్య బీజేపీ జెండాతో గెలిచిన వెంటనే ఈటల కేంద్రం మంత్రి అవతారంలో కనిపించనున్నారు.
* హుజురాబాద్ లో టీఆరెస్ ని ఓడించడం మొదటి దశ.. తాను కేంద్రం మంత్రి కావడం రెండో దశ.. తెలంగాణాలో టీఆరెస్ వ్యతిరేకులను ఒకే వేదికపై తేవడం మూడోదశ. కాంగ్రెస్ లో అసమ్మతి, అసంతృప్తితో రగిలిపోతున్న బలమైన నాయకులను కూడా బీజేపీలో చేర్చి.. తన లక్ష్యాన్ని నెరవేర్చుకునే దిశగా ఈటల అడుగులు పడుతున్నాయి. అయితే అనుకున్నంత ఈజీగా ఇవేం జరగవు. ఇవన్నీ ఎంత మేరకు జరుగుతాయనేది చూడాల్సి ఉంది..!
