Tollywood : వాస్తవంగా మాట్లాడుకుంటే ‘బాహుబలి‘ సినిమా కి ముందు ‘పాన్ ఇండియా‘ అనే పదం టాలీవుడ్ సినీ ప్రేక్షకులకు అసలు పరిచయం లేదు. ఈ చిత్రం దేశవ్యాప్తంగా కనీవినీ ఎరుగని రీతిలో కలెక్షన్లు సాధించి ఈ పదానికి ఇక్కడ మొట్టమొదటిసారి శ్రీకారం చుట్టింది.
Tollywood : బాహుబలి పునాది వేస్తే…
నటన, టాలెంట్ పరంగా చూసుకుంటే ప్రభాస్ కంటే మెరుగైన హీరోలు తెలుగు ఇండస్ట్రీలో ఉన్నారు అని చాలా మంది అంటుంటారు. అయినప్పటికీ బాహుబలి సినిమాకి అతను పెట్టిన కృషి, చేసిన త్యాగాలు చివరికి తగిన ఫలితాన్ని ఇచ్చాయి. దీంతో ప్రతి ఒక స్టార్ హీరోకి ‘పాన్ ఇండియా‘ పిచ్చి పట్టుకుంది. టాలీవుడ్ కు పాన్ ఇండియా స్థాయిలో గుర్తింపు రావడంతో దానిని వాడుకొని అందరూ అలా వెలిగిపోవాలని విశ్వప్రయత్నాలు చేస్తున్నారు కానీ అందులో సక్సెస్ అవుతున్న వారు ఎవరూ పెద్దగా కనిపించడం లేదు.
కెజిఎఫ్ మినహాయించి….
‘బాహుబలి‘ తర్వాత కేజిఎఫ్ తప్పించి మరే సినిమా కూడా పాన్ ఇండియా లెవెల్ లో క్లిక్ కాలేదు. కేజీఎఫ్ చిత్ర నిర్మాతలు కూడా దేశవ్యాప్తంగా పేరు వస్తే చాలు అనుకున్నారు కానీ ఈ రేంజ్ లో జనాలు రిసీవ్ చేసుకుంటాను అని అనుకోలేదు. ఒక రకంగా అదీ అదృష్టమే. రెండో భాగానికి మాత్రం ఎవరూ ఊహించని హైప్ వచ్చింది. కానీ పాన్ ఇండియా పేరుతో విడుదలైన మిగతా సినిమాలకు మాత్రం బయట పెద్దగా గుర్తింపు పొందలేదు.
మెగాస్టార్ వల్లే కాలేదు!
మెగాస్టార్ చిరంజీవి దేశవ్యాప్తంగా గుర్తింపు ఉన్న నటుడే అయినా… రాజకీయాల కారణంగా ఎన్నో ఏళ్ల బ్రేక్ తీసుకొని వచ్చిన తర్వాత ‘సైరా నరసింహారెడ్డి‘ పేరుతో పాన్ ఇండియా సినిమా చేశారు. కానీ తెలుగురాష్ట్రాల ఆవల ఈ చిత్రానికి ఊహించిన ఆదరణ దక్కలేదు. విజయ్ సేతుపతి, అమితాబచ్చన్ లాంటి స్టార్లు ఉన్నప్పటికీ నార్త్ లో థియేటలు ప్రేక్షకులు లేక వెలవెలబోయాయి. తమ స్థాయిని సరిగ్గా అంచనా వేయకుండా పాన్ ఇండియా రిలీజ్ అంటూ హంగామా చేస్తున్నారు కానీ వాటికి కనీస స్థాయిలో గుర్తింపు వస్తుందా లేదా అన్నది పట్టించుకోవట్లేదు.
Tollywood : మంచు ఫ్యామిలీ మునిగిపోయింది…!
మంచు విష్ణు మార్కెట్ తెలుగు రాష్ట్రాల్లోనే అంతంత మాత్రం. అలాంటివి అతను ‘మోసగాళ్లు‘ సినిమా తీసేసి ఇది పాన్ ఇండియా రిలీజ్ అని హడావుడి చేశారు. చివరికి చూస్తే ప్రమోషన్ ఖర్చులు కూడా పెద్దగా వచ్చినట్లు లేవు. తెలుగు రాష్ట్రాల్లో వారే పట్టించుకోకపోతే ఇక బయట వారి గురించి మాట్లాడుకుని అనవసరం. విష్ణు తమ్ముడు మనోజ్ సినిమా ‘అహంబ్రహ్మాస్మి‘ కూడా పాన్ ఇండియా రిలీజ్ అంటున్నారు. పాన్ ఇండియా సినిమా తీయడానికి… పాన్ ఇండియా లెవల్ లో రిలీజ్ చేయడానికి చాలా తేడా ఉంది. మనోజ్ కెరీర్ గ్రాఫ్ చూసినవారందరూ ఇటువంటి మాటలు విని విడ్డూరంగా ఎక్స్ప్రెషన్లు పెడుతున్నారు.
అల్లు అర్జున్ హీరోగా తెరకెక్కుతున్న ‘పుష్ప‘ సినిమా సైతం పాన్ ఇండియా బ్రాండ్ తో వస్తుంది. సుకుమార్ టాలెంట్, అల్లు అర్జున్ నటనా నైపుణ్యం చూసి ఈ సినిమాకు అటువంటి రేంజ్ రావచ్చు అని ఆశించవచ్చు కానీ తెలుగు రాష్ట్రాల బయట ఎలాంటి స్పందన ఉంటుందన్నది మాత్రం ఖచ్చితంగా ఎవరూ చెప్పలేరు. తెలుగులో ఒక సినిమా తీసి వేరే భాషల్లో అనువాదం చేసినంత మాత్రాన దానిని పాన్ ఇండియా సినిమా అని అనుకోవడం పొరపాటని పలువురు సలహా ఇస్తున్నారు.
