Vakeel Saab Movie : సినిమా విషయాలు.. విశేషాలు.. విశ్లేషణలోకి వెళ్లే ముందు కొన్ని కీలక పాయింట్లు..! “హిందీ పింక్ సినిమా చూసిన యాంటీ పవన్ కళ్యాణ్ బ్యాచ్ కి వకీల్ సాబ్ పెద్దగా నచ్చదు”.. “పింక్ చూసిన పవన్ కళ్యాణ్ అభిమానులకు వకీల్ సాబ్ భలే నచ్చుతుంది”..
“పింక్ సినిమా చూడకుండా ఫ్రెష్ గా వకీల్ సాబ్ చూసిన సగటు ప్రేక్షకుడికి ఇది నచ్చుతుంది”.. “పింక్ సినిమా చూసేసిన సగటు ప్రేక్షకుడికి ఈ సినిమా అతి అనిపిస్తుంది. కానీ బాగేనా ఉందిలే అనిపిస్తుంది” సో.. ఓవరాల్ గా చెప్పొచ్చేదేమిటంటే.. పింక్ తో పోలిక లేకుండా ఫ్రెష్ గా ఈ సినిమాని, పవన్ కళ్యాణ్ ని చూద్దాం అనుకుంటే ఈ సినిమాలో కిక్కు చూడొచ్చు. కథలో లీనమవ్వొచ్చు. ఆడాళ్లయితే సెకండ్ హాఫ్ లో కాస్త కన్నీటిని కూడా కార్చొచ్చు.
Vakeel Saab Movie : పింక్ కంటే వకీల్ ఎక్కడ..? ఎందుకు మారింది..!?
హిందీ పింక్ ఒక కమర్షియల్ కోణంలో తీయలేదు. అదొక కథ. కథని, కథనాన్ని నమ్ముకుని తీశారు. అక్కడ హీరో, హీరోయిన్, ఫైట్లు, ఫీట్లు కనిపించవు. కేవలం ముగ్గురు అమ్మాయిల కథ… వారికి అన్యాయం జరగడం.., పెద్దోళ్ల ఒత్తిళ్లు ఎదురవ్వడం.. న్యాయం కోసం మంచి క్రిమినల్ లాయర్ దగ్గరకు వెళ్లడం.. ఆ లాయర్ మంచి పాయింట్లతో ఈ అమ్మాయిలను గెలిపించడం.. చివరిగా న్యాయం గెలవడం… అదే సినిమా..! అందులో ఈ ముగ్గురు అమ్మాయిలూ మెయిన్.. ఆ తర్వాతే ఆ క్రిమినల్ లాయర్ పాత్ర.
ఆ ముగ్గురు వెనుక ఈ లాయర్ ఉండి కథని నడిపిస్తారు. కానీ…. ఇది తెలుగు పరిశ్రమ. ఇక్కడ హీరోయిజం ఉండాలి. ప్రేక్షకులు అలా అలవాటు పడ్డారు. ఇక్కడ కథ కంటే.. కథలో హీరోకే విలువ. ఇక్కడ కథ కంటే కథలో హీరో చేసే ఫైట్లు, ఫీట్లకే విలువ. ఇక్కడ కథ, కథనం కంటే బిల్డప్పులు.., భారీ డైలాగులకే విలువ..! కానీ… మూల కథని అలాగే తీసుకుని, తెలుగు రుచికి తగ్గట్టు.. పవన్ కళ్యాణ్ అనే ఒక పెద్ద హీరోని తీసుకుని.. మార్పులు చేసి మెప్పించేలా తీయడం కష్టమే. దాన్ని దర్శకుడు శ్రీరామ్ వేణు చక్కగా నడిపించారు.
సెకండ్ హాఫ్ సినిమాకి ప్రాణం పోసినట్టే…!
దర్శకుడు వేణు కథలో మార్పులు చేసుకుని.. కమర్షియల్ హంగులు ఇచ్చారు. పవన్ కళ్యాణ్ ఇమేజీకి తగ్గట్టు సీన్లు రాసుకున్నారు. ఆయన రాజకీయ నేపథ్యంలో కొన్ని డైలాగులు పేల్చారు. అయితే ఎక్కడ మూల కథ దెబ్బతినలేదు. పవన్ కళ్యాణ్ ఇమేజీ ట్రాప్ లో పడి.. ఓవర్ బిల్డప్పులతో తీస్తే సెకను హాఫ్ పండేది కాదు. సినిమాకి ప్రాణం సెకండ్ హాఫ్, కోర్టు సీన్లు. ఇవే సినిమాని ఓ రేంజికి తీసుకెళ్లాయి. కోర్టు సీన్లు వరకు మాత్రం పింక్, వకీల్ సాబ్ మధ్య పెద్దగా తేడాల్లేవు. మొదటి భాగం మాత్రం పవన్ కళ్యాణ్ తరహాలో..
ఆయన కోసమే ఎక్కువ సీన్లు రాసుకుని తీసినట్టు ఉంది. ఒక ఫ్లాష్ బ్యాక్.., అందులో పేదల తరపున ఉండడం.. పేదల కోసం పోరాడడం.. ఫైట్లు చేయడం.. ఎంపీకి సవాలు చేయడం వంటివి అదనపు హంగులుగా చేర్చారు. అవన్నీ వదిలేస్తే… సినిమా సెకండ్ హాఫ్ మొదలయ్యేది కోర్టు సీన్లతోనే. అక్కడి నుండి ప్రేక్షకుడికి పవన్ కళ్యాణ్ కనిపించరు. పాత్రలు, వాదనలు, పాయింట్లు, కథ మాత్రమే కనిపిస్తుంది. అందుకే ఇదీ హిట్టు బొమ్మగా టాక్ పొందింది. ముఖ్యంగా రెండో భాగంలో పవన్ కళ్యాణ్ లో ఒక పరిపక్వ నటుడు కనిపిస్తే…, ప్రకాష్ రాజ్, నివేద థామస్ ల నటన పీక్స్ లో ఉంటుంది. నివేదా తన జీవితం మొత్తం గుర్తుంచుకునే పాత్ర చేసి, జీవించారు..!
ఎందుకు చూడాలి..!? ఎందుకు వద్దు..!?
అమ్మాయిల జీవితంలో సాధారణంగా ఎదురయ్యే సవాళ్లు.. వారిపై మగాళ్ల చూపు వంటి అంశాలను సున్నితంగా ఆవిష్కరించారు. కోర్టు సీన్లలో పవన్ కళ్యాణ్ డైలాగులు, ఆయన వాదనలో అంశాలన్నీ సమాజంలో మహిళలు ఎదుర్కొంటున్న ప్రాక్టీకల్ సమస్యలే. ఇటువంటి వాదనలు, కోర్టు సీన్లు బాగా కుదిరాయి. సెకండ్ హాఫ్ లో ఎవ్వరూ అతికి పోకుండా జీవించారు.
తెలియకుండానే ఎమోషనల్ సీన్లలోకి తీసుకెళ్లారు. “ఆర్ యు వర్జిన్..!?” అనే ప్రకాష్ రాజ్ ప్రశ్న.. అందుకే నివేదా థామస్ సమాధానమిస్తూ పలికించిన హావభావాలు బహుశా తెలుగు సినీ తెరపై ఇది వరకు కనిపించలేదు. నివేదా తన జీవితం మొత్తం గుర్తుంచుకునే పాత్ర చేసి, జీవించారు..! మొదటి భాగంపై పెద్దగా దృష్టి లేకపోయినా… రెండో భాగంలో కోర్టు సీన్లు కోసం మాత్రం సినిమా చూడాలి. మహిళల సెంటిమెంట్…, మహిళలపై జరుగుతున్నా దాడులు, మహిళలను చూస్తున్న విధానం వంటి అంశాలను వివరించడం ప్రాక్టీకల్ గా ఉంది.
