థియేటర్ల శకం ముగియనుందా?
కరోనా వల్ల దేశంలో ఎన్నో రంగాలకు విపరీతమైన నష్టం వాటిల్లగా వాటిలో ప్రప్రధమంగా చిత్ర పరిశ్రమ గురించి మనం చెప్పుకోవాలి. ఒక్క టాలీవుడ్ కే ఈ లాక్ డౌన్ కారణంగా ఐదు వందల కోట్ల రూపాయలు నష్టం వాటిల్లింది అంటే అతిశయోక్తి కాదు. ఎన్నో లక్షలమంది చిత్ర పరిశ్రమ కార్మికులకు ఉపాధి లేకుండా పోయింది. పదుల సంఖ్యలో సినిమాల షూటింగ్ ఆగిపోయింది. చాలా సినిమాలు ఇక ఈ సమస్యలను భరించలేక విడుదల ను రద్దు చేసుకుని ఓటిటి ప్లాట్ ఫార్మ్స్ వైపు మొగ్గు చూపారు. ఇప్పటికే థియేటర్ ను ఆందోళన పరిచే రీతిలో ఓటిటి ప్లాట్ ఫార్మ్స్ అనగా అమెజాన్ ప్రైమ్, నెట్ ఫ్లిక్స్, సన్ నెక్స్ట్ వంటి యాప్స్ లో చిత్రం విడుదలైన నెలరోజుల్లోనే ప్రేక్షకులు వాటిని తిలకిస్తున్నారు. పెద్ద హీరోల చిత్రాలు అంటే కచ్చితంగా అందరికన్నా ముందే చూడాలి అని ఉత్సాహంతో థియేటర్ల ముందు వాలిపోతున్నారు కానీ మీడియం బడ్జెట్ సినిమాలు మరియు చిన్న సినిమాలను ఒక నెల అయితే మన ల్యాప్ టాప్ లేదా టీవీ లో ఓటిటి ప్లాట్ ఫార్మ్స్ మరియు యాప్స్ ద్వారా చూసుకోవచ్చని జనాలు థియేటర్లకు వెళ్లడం మానేశారు. ఇక ఈ డ్రామా వెబ్ సిరీస్ లు వచ్చిన తర్వాత సినిమాల పై ఇంట్రెస్ట్ కూడా కొద్దిగా తగ్గుతోంది అనడంలో ఎలాంటి సందేహం లేదు. ఎంతో మంది ప్రొడ్యూసర్లు దేశవ్యాప్తంగా థియేటర్లో సినిమాలు విడుదల చేయకుండా ఈ లాక్ డౌన్ నేపథ్యంలో నేరుగా ఓటిటి ప్లాట్ ఫార్మ్స్ లోకి తమ చిత్రాలను మంచి రేట్లకు అమ్మివేసిన విషయం తెలిసిందే. అయితే రానున్న రోజుల్లో సినిమా ఆడుతుందో లేదో గ్యారెంటీ లేని పక్షంలో తమ నిర్మాణానికి అయ్యే బడ్జెట్ ను తగ్గించుకొని మంచి రేటుకి ఈ ఓటిటి యాప్ లకు తమ సినిమాను ఆమ్మే దిశగా కూడా వారి అడుగులు పడుతున్నాయి అని సమాచారం. ఇక థియేటర్ల విషయానికి వస్తే కరోనా తర్వాత ఎవరూ ధైర్యం చేసి మునుపటిలా సినిమా హాళ్ళకు…. మల్టీప్లెక్స్ లకు వెళ్లే పరిస్థితి అయితే లేదు. అదీ కాకుండా ఇంట్లోనే హాయిగా కూర్చుని తమకు నచ్చిన సిరీస్ ను లేదా సినిమాను స్మార్ట్ టీవీ లో చూడటానికే ప్రజలు క్రమేపీ మొగ్గుచూపుతున్నారు. ఈ క్రమంలో ఔత్సాహిక ఫిలిం మేకర్లకు చిత్ర పరిశ్రమలో నిలదొక్కుకునేందుకు ఓ చక్కని మార్గం లభిస్తుంది. మూవీలను తీసి ఓటీటీ యాప్లలో రిలీజ్ చేయవచ్చు. ఒక వేళ వారు విడుదల చేసే సినిమాలు హిట్ అయితే.. ఇక వారు వెను దిరిగి చూడాల్సిన పని ఉండదు. పుష్కలంగా అవకాశాలు లభిస్తాయి. సినిమా చాన్స్లు వెతుక్కుంటూ వస్తాయి. దీంతో వారు తమ కలలను నిజం చేసుకోవచ్చు. ఈ విధంగా ఓటీటీ యాప్లు ఔత్సాహిక ఫిలిం మేకర్లకు చక్కని అవకాశాన్ని అందిస్తున్నాయి. మరి రానున్న రోజుల్లో థియేటర్ల గతి ఎలా ఉండబోతోందో....