RRR OTT: దర్శకధీరుడు అత్యంత ప్రతిష్టాత్మకంగా తెరకెక్కించిన భారీ మల్టీస్టారర్ చిత్రం `ఆర్ఆర్ఆర్(రౌద్రం రణం రుధిరం)`. డివివి ఎంటర్టైన్మెంట్స్ బ్యానర్పై డివివి దానయ్య నిర్మించిన ఈ చిత్రంలో మెగా పవర్ స్టార్ రామ్ చరణ్, యంగ్ టైగర్ ఎన్టీఆర్ హీరోయిలుగా నటించారు. వీరిద్దరికీ జోడీగా అలియా భట్, ఒలీవియా మోరిస్ నటించగా.. బాలీవుడ్ స్టార్ హీరో అజయ్ దేవ్గన్, శ్రీయ కీలక పాత్రలను పోషించారు.
చరిత్రలో ఎన్నడూ కలుసుకోని స్వాతంత్ర్య సమరయోధులు అల్లూరి సీతారామరాజు, కొమురం భీమ్లు కలిసి బ్రిటీష్ వారిని ఎదిరిస్తే ఎలా ఉంటుంది అనే కల్పిత కథతో రూపుదిద్దుకున్న ఆర్ఆర్ఆర్ చిత్రం ఈ ఏడాది జనవరి 7న ప్రపంచవ్యాప్తంగా అనేక భాషల్లో విడుదల కావాల్సి ఉంది. కానీ, కరోనా కొత్త వేరియంట్ ఒమిక్రామ్ వెలుగు చూడటం, మరోవైపు కరోనా కేసులు భారీగా పెరిగిపోతుండడంతో.. పలు రాష్ట్రాలు మళ్లీ ఆంక్షల వలయంలోకి వెళ్లిపోతున్నాయి. ఈ నేపథ్యంలోనే ఆర్ఆర్ఆర్ను వాయిదా వేశారు మేకర్స్.
అయితే ఇప్పటి వరకు నాలుగు సార్లు వాయిదా పడిన ఈ చిత్రాన్ని తమ ఓటీటీలో డైరెక్ట్ రిలీజ్ చేయాలంటూ ప్రముఖ ఓటీటీ సంస్థ అమెజాన్ ప్రైమ్ వీడియో వారు దర్శకనిర్మాతలైన రాజమౌళి, దానయ్యలకు కళ్ళు చెదిరే ఆఫర్ ఇచ్చారట. ఎంతో తెలుసా.. రూ.200 కోట్లు. ఈ ఫిగర్ వింటే ఎవ్వరికైనా మతిపోతుంది. అలాగే చేతులారా ఎవ్వరూ ఇటువంటి ఆఫర్ను వదులుకోరు. కానీ, ఆర్ఆర్ఆర్ మేకర్స్ మాత్రం రిజెక్ట్ చేశారు. ఎందుకంటే, ఈ సినిమా కోసం రూ.400 కోట్లకు పైగానే బడ్జెట్ పెట్టారు. రూ. 200 కోట్లకే సినిమాను ఇచ్చేస్తే పెట్టిన ఖర్చు కూడా రాదు. ఇక ఆర్ఆర్ఆర్ ను మొదటి నుంచి థియేటర్స్లోనే విడుదల చేయాలని మేకర్స్ గట్టిగా భీష్మించుకున్నారు. అందువల్లనే అమెజాన్ ఆఫర్ను జక్కన్న, దానయ్యలు సున్నితంగా రిజెక్ట్ చేశారట.