మెగాస్టార్ చిరంజీవి సినిమా అంటే ఫ్యాన్స్ కి పండగ. ఆరు పాటలు, అయిదు ఫైట్లు, మాస్ సన్నివేశాలు, మేనరిజమ్స్.. ఇవే ఉంటాయి. చిరంజీవి సినిమాపై సగటు తెలుగు ప్రేక్షకుడి ఆలోచనలు ఇవే. ఈ అంశాలే చిరంజీవిని మెగాస్టార్ ను చేశాయి. నెంబర్ వన్ హీరోగా ఇప్పటికీ నిలబెట్టాయి. అయితే.. అప్రతిహతంగా కొనసాగుతున్న ఆయన కెరీర్లో చిన్న కుదుపు. రెగ్యులర్ మాస్ అంశాల్లో పడి కథ, కథనంపై పట్టు కోల్పోయారు. దీంతో వరుస ఫ్లాపులు. నేటికి సరిగ్గా 25 ఏళ్ల క్రితం 1995 డిసెంబర్ 14న విడుదలైన ‘రిక్షావోడు’ చిరంజీవిని ఆలోచనలో పడేసింది. తాను వెళ్లాల్సిన మరో దారిని చూపించింది.
1992లో ఘరానామొగుడు తర్వాత 1996లో చేసిన రిక్షావోడు వరకూ చేసిన 8 సినిమాల్లో కేవలం ముఠామేస్త్రి, అల్లుడా మజాకా మాత్రమే హిట్ అయ్యాయి. అన్నీ కమర్షియల్ ఫార్మాట్లే. ఏ జోనర్ తనను అత్యున్నత స్థానానికి తీసుకెళ్లిందో అదే ఫార్మాట్ చిరంజీవికి ప్రతిబంధకంగా మారింది. తన సినిమా అంటే ఫైట్లు, పాటలు, మాస్, దాదాపు ప్రతి ఫ్రేములో తానుండాలి.. వీటన్నింటినీ పక్కకు పెట్టారు. కోడి రామకృష్ణ దర్శకత్వంలో వచ్చిన రిక్షావోడు ఫ్లాప్ తో ఏకంగా ఏడాది పాటు చిరంజీవి సినిమాలకు దూరంగా ఉన్నారు. ఆయన కెరీర్లో అప్పటివరకూ ఎప్పుడూ సినిమా రాని ఏడాది లేదు. కానీ.. 1996లో ఏ సినిమా చేయకుండా ఎటువంటి సినిమా చేయాలో ఆలోచించారు.
మళయాళంలో హిట్ అయిన హైఎండ్ సిస్టర్ సెంటిమెంట్ మూవీ ‘హిట్లర్’ రీమేక్ చేయాలని ఫిక్స్ అయ్యారు. దర్శకుడిగా సాఫ్ట్, ఫ్యామిలీ మూవీస్ డైరక్టర్ గా ముత్యాల సుబ్బయ్యను ఎంచుకున్నారు. ఇవన్నీ చిరంజీవి సినిమాకు ఉండాల్సినవి కాదు.. ఫ్యాన్స్ యాక్సెప్ట్ చేసేవి కావు. కానీ.. చిరంజీవి ఆలోచన, అనుభవం వర్కౌట్ అయ్యాయి. హిట్లర్ హిట్. అదే ఫార్ములాను ఉపయోగిస్తూ.. కథ, కథనం, తన మార్క్ అంశాలతో వరుసగా చేసిన మాస్టర్, బావగారూ.. బాగున్నారా, చూడాలని వుంది, స్నేహం కోసం.. ఇలా వరుస హిట్లతో దూసుకుపోయారు. ‘రిక్షావోడు’ ఫ్లాప్ కూడా చిరంజీవికి అలా కలిసొచ్చిందనే చెప్పాలి.