Tollywood: టాలీవుడ్ Tollywood గతేడాది కరోనా దెబ్బతో ఇప్పుడిప్పుడే కోలుకుంటున్న సినిమా మళ్లీ ప్రమాదంలో పడింది. ముఖ్యంగా టాలీవుడ్ విచిత్ర పరిస్థితిని ఎదుర్కొంటోంది. గతేడాది కీలకమైన వేసవి, దసరా సీజన్లు దక్కకుండా పోయాయి. ఈ ఏడాది సంక్రాంతి కలిసొచ్చి చిత్ర పరిశ్రమలో కళ కనిపించింది..ఇక వేసవే తరువాయి అనుకున్న దశలో సెకండ్ వేవ్ ఆ ఆశలపై నీళ్లు చల్లేస్తోంది. నిజానికి గతేడాది కరోనా దెబ్బకి ప్రపంచవ్యాప్తంగా కోలుకున్న చిత్ర పరిశ్రమ లేదు. బాలీవుడ్ సినిమా పరిస్థితి పక్కనపెడితే తెరుచుకోని ధియేటర్లు కూడా ఉన్నాయి. దక్షిణాదిలో సినిమాలు విడుదలయ్యాయి కానీ.. టాలీవుడ్ మినహా ఎక్కడా సక్సెస్ రేటు లేదు.
టాలీవుడ్ పుంజుకోవడం దేశీయ చిత్ర పరిశ్రమను నివ్వెరపరచింది. 2020 డిసెంబర్లో సోలోబ్రతుకే సోబెటర్ తర్వాత.. ఇప్పటివరకూ ఏకంగా 76 సినిమాలు విడుద కావడం విశేషం. వీటిలో సంక్రాంతికి క్రాక్, ఫిబ్రవరిలో ఉప్పెన, మార్చిలో జాతిరత్నాలు, ఏప్రిల్ లో వకీల్ సాబ్ బాక్సాఫీస్ దుమ్ము దులిపేశాయి ఉప్పెన, వకీల్ సాబ్ 100 కోట్లు, క్రాక్, జాతిరత్నాలు 50 కోట్ల సినిమాలయ్యాయి. ఈస్థాయి కలెక్షన్లు, సక్సెస్ రికార్డు కరోనా మొదటి వేవ్ తర్వాత దేశంలో మరే చిత్ర పరిశ్రమలోనూ నమోదు కాలేదు. సంక్రాంతి సందడి బాగుంది.. వేసవి హవా మొదలవుతుంది అనుకున్న తరుణంలో సెకండ్ వేవ్ వచ్చి పడింది. సినిమాల రిలీజ్ లు ఆగిపోయాయి. షూటింగ్స్ నిలిచిపోయాయి. ధియేటర్లలో షో పడట్లేదు.
తెలంగాణలో వకీల్ సాబ్ ఆడుతున్న ధియేటర్లు మినహా మే 1 వరకూ ధియేటర్లు స్వచ్ఛందంగా మూసేశారు. ఏపీలో ఏం చేయాలా అనే చర్చలు జరుగుతున్నాయి. సినిమాపై ప్రేక్షకుల ఇష్టం మరోసారి ప్రూవ్ అయిందని టాలీవుడ్ సంబరపడి వేసవికి సినిమాలన సిద్ధం చేశారు. కానీ.. అతిపెద్ద కలెక్షన్ల సీజన్ కు ఈ ఏడాది కూడా దెబ్బ పడిపోయినట్టే. టక్ జగదీశ్, లవ్ స్టోరీ, ఇష్క్, విరాటపర్వం.. ఇలా సినిమాలన్నీ వాయిదా పడ్డాయి. మేలో రిలీజ్ పెట్టుకున్న పెద్ద సినిమాలు వెనక్కు వెళ్లేలా ఉన్నాయి. ప్రస్తుత పరిస్థితుల్లో ఎప్పుడు మార్పు వస్తుందో చెప్పలేని పరిస్థితి. సెకండ్ వేవ్ దెబ్బకు చిత్ర పరిశ్రమ మరోసారి సంక్షోభం ఎదుర్కోక తప్పేలా లేదు.
