RRR Movie: ద‌ర్శ‌క‌ధీరుడు రాజ‌మౌళి ఎంతో ప్ర‌తిష్టాత్మ‌కంగా తెర‌కెక్కించిన తాజా చిత్రం `ఆర్ఆర్ఆర్‌(రౌద్రం రణం రుధిరం)`. యంగ్ టైగ‌ర్ ఎన్టీఆర్, మెగా ప‌వ‌ర్ స్టార్ రామ్ చరణ్ హీరోలుగా న‌టించిన ఈ చిత్రాన్ని దాదాపు రూ.400 కోట్ల బ‌డ్జెట్‌తో డివివి ఎంటర్టైన్మెంట్స్ బ్యాన‌ర్‌పై డివివి దాన‌య్య ఈ చిత్రాన్ని నిర్మించారు. చ‌రిత్ర‌లో ఎన్న‌డూ క‌ల‌వ‌ని స్వాతంత్ర్య సమరయోధులైన అల్లూరి సీతారామరాజు, కొమురం భీమ్ లు క‌లిసి ప్ర‌జ‌ల కోసం బ్రిటీష్ వారిపై పోరాటం చేసి ఎలా గెలిచారు అన్న క‌ల్పిత క‌థ‌తో ఈ చిత్రం రూపుదిద్దుకుంది.
ఇందులో రామ్‌గా చరణ్, భీమ్‌గా తార‌క్‌లు న‌టించ‌గా.. వీరి స‌ర‌స‌న అలియా భ‌ట్‌, ఒలీవియా మోరిస్ హీరోయిన్లుగా చేశారు. ఎప్పుడో షూటింగ్ పూర్తి చేసుకున్న ఈ చిత్రం అనేక వాయిదాల అనంత‌రం పోయిన జ‌న‌వ‌రి 7న విడుద‌ల‌కు ముస్తాబైంది. కానీ, క‌రోనా ఉగ్ర‌రూపం దాల్చ‌డంతో మేక‌ర్స్ ఆర్ఆర్ఆర్‌ను మ‌రోసారి పోస్ట్ పోన్ చేశారు.
ప‌రిస్థితులు అనుకూలిస్తే ఈ సినిమా మార్చిలో లేదా ఏప్రిల్‌లో విడుద‌ల అయ్యే అవ‌కాశాలు ఉన్నాయి. ఇకపోతే ఈ సినిమాకు సంబంధించి జ‌క్క‌న్న ఎక్క‌డా బ‌య‌ట‌పెట్ట‌ని ఓ ఆస‌క్తిక‌ర విష‌యాన్ని ఇప్పుడు బ‌య‌ట‌పెట్టారు. పూర్తి వివ‌రాల్లోకి వెళ్తే.. ఆర్ఆర్ఆర్‌లో రామ్, భీమ్ పాత్ర‌ల‌కు సమ ప్రాధాన్యత ఉంటుందా..? లేదా..? అన్న దానిపై ఎప్ప‌టి నుంచో చ‌ర్చ‌లు జ‌రుగుతున్నాయి.
ఈ చ‌ర్చ‌లపై రాజ‌మౌళి ఇప్ప‌టి వ‌ర‌కు స్ప‌ష్ట‌మైన క్లారిటీ ఇవ్వ‌క‌పోయినా.. తాజాగా ఓ తమిళ మీడియా ఇంట‌ర్వ్యూలో మాత్రం రామ్-భీమ్‌ల‌లో త‌న‌కిష్ట‌మైన పాత్రేదో చెప్పేశారు. ఆయ‌న మాట్లాడుతూ.. `రామ్ అండ్ భీమ్ లలో ఎవరు ఇష్టం అంటే చెప్పడం చాలా కష్టం. అయితే ఈ రెండు పాత్రల్లో నేను ఎక్కువగా ఇష్టపడేది మాత్రం రామ‌రాజు పాత్రనే` అంటూ జ‌క్క‌న్న కుండ‌బ‌ద్ద‌లు కొట్టేశారు. దీంతో రాజ‌మౌళి వ్యాఖ్య‌ల‌కు మెగా ఫ్యాన్స్ ఖుషీ అయిపోయినా.. ఎన్టీఆర్ ఫ్యాన్స్ మాత్రం తీవ్ర అస‌హ‌నం వ్య‌క్తం చేసుకున్నాడు.
