Tollywood: రకుల్ ప్రీత్ సింగ్.. తెలుగునాట క్రేజ్ హీరోయిన్లలో ఈమె ఒకరు. అందంతోపాటుగా అభినయం ఈమె సొంతం. ఆమధ్య రిలీజైన ‘కొండపొలం’ సినిమా టాక్ ఎలా వున్నా, రకుల్ నటనకి మంచి మార్కులే పడ్డాయి. ఇక ఈమె ఫిట్‌నెస్ గురించి అంద‌రికీ తెలిసిందే. ఏమాత్రం ఖాళీ దొరికినా రకుల్ జిమ్ లోనే సమయం గడుపుతుంది. అందుకే మూడు ప‌దులు వ‌య‌సు దాటినా మతిపోయే గ్లామ‌ర్ ఆమె సొంతం. తాజాగా ఓ మీడియా సమావేశంలో ఆమె చేయని పాత్రల గురించి వివరించింది.
రకుల్ ఏం చెప్పారు?
పాత్ర డిమాండ్ ను బట్టి బరువు పెర‌గాల‌న‌డం, త‌గ్గాల‌నడం అనే విషయాలు ఆమెకి ఎంతమాత్రం నచ్చవట. ఎందుకంటే మామ్మూలుగానే ఫిట్ నెస్ అంటే ప్రాణం పెట్టే అమ్మడుకి ఇలాంటివి చేస్తే తరువాత కాలంలో విపరీతమైన హెల్త్ సమస్యలు వస్తాయని చెబుతోంది. వెంట‌నే బరువు పెర‌గ‌డం, ఆ వెంట‌నే బరువు తగ్గడం అనేవి శారీరకంగా అంత మంచిది కాదని రకుల్ చెబుతోంది. ఇక్కడ కొసమెరుపు ఏమిటంటే, అలా బరువు తగ్గడం లాంటి పాత్ర‌లు చేయ‌మ‌ని తనని ఇంతవరకు ఎవరూ అడగలేదట!
రకుల్ బిజినెస్ వివరాలు:
రకుల్ ప్రీత్ సింగ్ టాలీవుడ్‌లో అనతికాలంలోనే మంచి పేరు తెచ్చుకుంది. వెంకటాద్రి ఎక్స్‌ప్రెస్ ఘన విజయం తరువాత ఆమె శ‌ర‌వేగంగా సినిమాలు చేస్తూ వ‌చ్చారు. ముఖ్యంగా మ‌హేశ్‌, ఎన్టీఆర్‌, రామ్‌చ‌ర‌ణ్ వంటి అగ్ర హీరోలంద‌రితో న‌టించారు. ఇక ఈమె మంచి వ్యాపారవేత్త కూడా. ఓ వైపు సినిమాలు చేస్తూనే మ‌రో వైపు ఫిట్‌నెస్ రంగంలో రాణిస్తూ బిజీగా ఉన్నారు రకుల్. ప్రస్తుతం ఎఫ్ 45 అనే జిమ్ సెంట‌ర్‌ను రకుల్ నిర్వ‌హిస్తున్నారు. అమ్మడుకి వీలు చిక్కినప్పుడల్లా సోష‌ల్ మీడియాలో ఫిట్‌నెస్ ర‌హ‌స్యాలు, యోగ గురించి చెబుతూ మంచి యాక్టివ్‌గా వుంటారు.