Aacharya: “ఆర్ఆర్ఆర్” విజయంతో మంచి జోష్ మీద ఉన్నాడు మెగా పవర్ స్టార్ రామ్ చరణ్ తేజ్. సినిమాలో రామ రాజు క్యారెక్టర్ లో చెర్రీ నటన నెక్స్ట్ లెవెల్ లో ఉందని సినిమా చూసిన ఆడియన్స్ చెప్పుకొస్తున్నారు. ముఖ్యంగా చెర్రీ నటనకు హిందీ ప్రేక్షకులు బ్రహ్మరథం పడుతున్నారు. ప్రస్తుతం సినిమాకి వస్తున్న ఆదరణ బట్టి చూస్తుంటే “ఆర్ఆర్ఆర్” మరో “బాహుబలి” మాదిరిగా రికార్డులు సృష్టించడం గ్యారెంటీ అని బలమైన టాక్ ఇండస్ట్రీ నుండి వినబడుతుంది. మొదటి వారం సినిమా కలెక్షన్లు 700 కోట్లకు పైగా సాధించడంతో ఇంకా రెండు వారాల్లో పదమూడు వందల కోట్లు కలెక్ట్ చేయడం గ్యారెంటీ అని చెప్పుకొస్తున్నారు. పైగా పరీక్షలు కూడా ముగిసే సమయం కావడంతో…”ఆర్ఆర్ఆర్” కి టైమింగ్ బాగా కలిసి వచ్చే అవకాశాలు ఉన్నాయి.
ఇదిలా ఉంటే ఇప్పుడు రామ్ చరణ్ ఒకపక్క శంకర్ సినిమా షూటింగ్ లో బిజీగా గడుపుతున్నారు. అయితే ఈ నెలలోనే “ఆచార్య” సినిమా విడుదల అవుతున్న తరుణంలో… తన పాత్రకు సంబంధించి చరణ్ డబ్బింగ్ స్టార్ట్ చేశారు. ఉగాది పండుగ సందర్భంగా ఈరోజు “ఆచార్య” లో సిద్ధ పాత్రకి చరణ్ డబ్బింగ్ చెబుతున్నారు. సినిమాలో చిరంజీవి శిష్యుడి పాత్రలో చరణ్ నటించడం జరిగింది. కొరటాల శివ దర్శకత్వంలో తెరకెక్కిన ఈ సినిమాలో ప్రధానపాత్రలో చిరంజీవి నటించగా స్టోరీ మొత్తం చరణ్ పాత్రకు సంబంధించి ఉంటుందని సమాచారం.
దాదాపు 40 నిమిషాల పాటు చరణ్ పాత్ర సినిమాలో ఉంటుందని ఇందులో 20 నుండి 25 నిమిషాలపాటు చిరంజీవి పక్కనే చరణ్ కనిపిస్తాడని ఇండస్ట్రీ టాక్. చరణ్ సరసన పూజా హెగ్డే నటించగా మెగాస్టార్ చిరంజీవి సరసన కాజల్ అగర్వాల్ హీరోయిన్ గా నటిస్తోంది. ఏప్రిల్ 29వ తారీకు సినిమా రిలీజ్ కానున్న తరుణంలో ఏప్రిల్ మూడో వారం నుండి సినిమాకి సంబంధించిన ప్రమోషన్ కార్యక్రమాలు స్టార్ట్ చేసే ఆలోచనలో సినిమా యూనిట్ ఉంది. ఒకపక్క సినిమా లో నటిస్తూనే మరో పక్క నిర్మాతగా చరణ్ వ్యవహరిస్తూ ఉండటంతో.. ప్రమోషన్ కార్యక్రమాలు భారీ ఎత్తున చేపట్టే ఆలోచన చేస్తున్నట్లు సమాచారం.
