దర్శకధీరుడు రాజమౌళి సినిమా సినిమాకు ఎక్కువ సమయం తీసుకుంటాడన్న సంగతి తెలిసిందే. ఏళ్లపాటు షూటింగ్ చేస్తారు. తీసే సన్నివేశం, సినిమా ఔట్ పుట్ లో పర్ఫెక్షన్ కోసమే అంత సమయం తీసుకుంటారు. అందుకే ఇండస్ట్రీలో రాజమౌళికి జక్కన్న అనే పేరు స్థిరపడిపోయింది. ఈరోజు రాజమౌళి పుట్టినరోజు. ఆర్ఆర్ఆర్ టీమ్ అంతా సరదాగా ఓ చిన్న వీడియో చేశారు. అందులో రాజమౌళి పనితీరుతో తామెంత విసిగిపోతున్నామో తమషాగా చెప్పుకొచ్చారు. ప్రస్తుతం ఈ వీడియో వైరల్ అవుతోంది.
‘షూటింగ్ కు వెళ్లగానే 40 అడుగుల ఎత్తు నుంచి దూకే షాట్ చెప్తారు. బాగుంది. ఏలా చేస్తారు అని అడగ్గానే ‘నువ్వే చేస్తున్నావ్’ అంటారు సింపుల్ గా. ల్యాప్ టాప్ తెప్పించి అప్పటికే డిజైన్ చేసిన సన్నివేశాలు చూపిస్తారు. ఇంకేం చేస్తాం.. చేయకుండా..!’ అని రామ్ చరణ్ అన్నారు.
‘కష్టమైన షాట్స్ అన్నీ రిలాక్స్ మూడ్ లోకి వెళ్తున్నామనగా 12కి చెప్తాడాయన. 4 అయిపోతుంది. ఆకలి దంచేస్తున్నా పట్టించుకోడు. ఒక్క షాట్ 4 గంటలు తీస్తాడు. ఈయన పర్ఫెక్షన్ కోసం మమ్మల్ని చంపేస్తూంటాడు. అందుకే జక్కన్న అనేది’ అని ఎన్టీఆర్ అన్నారు.
‘షూటింగ్ ఎప్పుడు ప్యాక్ అప్ చెప్తారో తెలీదు. హమ్మయ్య.. షూటింగ్ అయిపోయింది.. ఇంటికెళ్దాం అనుకునేలోపు మీటింగ్ పెడతారు. రేపటి సన్నివేశాల గురించి వివరిస్తూ సాగిదీస్తూ ఉంటారు. నేనేమో టైమ్ చూసుకుంటూ ఉంటాను’ అని సెంధిల్ కుమార్ అన్నారు.
‘రాజమౌళి ఎప్పుడూ ఏదో ఆలోచిస్తూ ఉంటారు. ఉదయం పూట మరీను. గుడ్ మార్నింగ్ చెప్పాలంటే కూడా ఆలోచిస్తాను. ఆయన్ను డిస్టర్బ చేస్తున్నట్టు అనిపిస్తుంది. ఓసారి ఇలానే చెప్తే హా.. చెప్పండి అంటూ కంగారు పడతారు. అందుకే ఆయన్ను డిస్టర్బ్ చేయాలంటే భయం’ అని సాబూ సిరిల్ అన్నారు.
‘పల్లవి జనవరిలో రాస్తే జూన్, జూలైల్లో చరణం అంటాడు. డిసెంబర్ లో లిరిక్స్ రాస్తే తర్వాత ఏడాది మార్చిలో రికార్డింగ్ అంటాడు. మళ్లీ నవంబర్ లో వాయిస్ మిక్సింగ్ అంటాడు. అసలు మనం ఏం అనుకున్నామో.. ఏం చేస్తున్నామో అంటూ ఇంట్రెస్ట్ పోతుంది’ అని కీరవాణి అన్నారు.
వీరితోపాటు నిర్మాత దానయ్య, పలువురు కో-డైరెక్టర్లు కూడా రాజమౌళితో ఎంత విసిగిపోతున్నామో నటిస్తూ సరదాగా చూపించారు. మొత్తానికి రాజమౌళికి మంచి బర్త్ డే గిఫ్ట్ ఇచ్చారు.