సినిమాలకు, రాజకీయాలకు అవినాభావ సంబంధం ఉంది. సినిమాల నుంచి రాజకీయాల్లోకి వచ్చినవారిలో తెలుగులో ఎన్టీఆర్, తమిళనాడులో ఎంజీఆర్, కరుణానిధి, జయలలిత.. ఉన్నారు. ప్రస్తుతం తెలుగులో పవన్ కల్యాణ్, తమిళనాడులో రజినీకాంత్, కమల్ హాసన్ పొలిటికల్ పార్టీలు స్థాపించారు. ఇప్పుడు వీరి బాటలోనే తమిళ సూపర్ స్టార్ విజయ్ కూడా పొలిటికల్ ఎంట్రీ ఇవ్వనున్నారని వార్తలు వచ్చాయి. అయితే.. ఈ వార్తలకు కాస్త భిన్నంగా పరిణామాలు జరిగాయి. ఆయన తండ్రి ఎస్ఏ చంద్రశేఖర్ రాజకీయ పార్టీ స్ధాపించారు. దీనిపై విజయ్ స్పందించిన తీరు ఇప్పుడు తమిళనాట సంచలనంగా మారింది.
విజయ్ కు తమిళనాడులో భారీ ఫ్యాన్ ఫాలోయింగ్ ఉంది. తన అభిమాన సంఘంను మక్కళ్ ఇయక్కం అభిమాన సంఘంగా పిలుస్తారు. రీసెంట్ గా విజయ్ తండ్రి చంద్రశేఖర్ రాజకీయ పార్టీ స్థాపించారు. మక్కళ్ ఇయక్కంను రాజకీయ పార్టీగా మారుస్తున్నట్టు ప్రకటించారు. అయితే.. ఇదంతా విజయ్ అనుమతి లేకుండానే జరిగిందని తెలుస్తోంది. దీంతో తండ్రి చర్యపై విజయ్ కాస్త ఘాటుగానే రియాక్ట్ అయ్యారు. తనకు ఆ పార్టీతో ఎటువంటి సంబంధం లేదని ప్రకటించారు. దీంతో తమిళనాడులో తండ్రీ కొడుకుల మధ్య జరుగుతున్న ఈ అంశం తీవ్ర చర్చనీయాంశమైంది. విజయ్ రాజకీయాల్లోకి రావాలనే డిమాండ్లూ ఎక్కువయ్యాయి. కానీ.. విజయ్ మాత్రం రాజకీయాలపై ఎటువంటి ప్రకటనా చేయలేదు. ఈ నేపథ్యంలో విజయ్ మరికాస్త ముందుకెళ్లి తన నిర్ణయంపై తానెంత గట్టిగా ఉన్నానో తెలియజేశారు.
తమిళనాడులోని 30 జిల్లాల అభిమాన సంఘాల నాయకులతో అత్యవసర సమావేశం నిర్వహించారు. మధురైలో ఈ సమావేశం జరిగినట్టు తెలుస్తోంది. ఈ సమావేశంలో విజయ్ మాట్లాడుతూ.. ‘నా తండ్రి స్థాపించిన రాజకీయ పార్టీతో నాకు ఎటువంటి సంబంధం లేదు. నా పేరు గానీ, ఫొటో గానీ ఆ రాజకీయ పార్టీలో ఉపయోగించినా.. ఫ్లెక్సీల్లో నా పేరు వాడినా చర్యలు తీసుకుంటాను. ఆ పార్టీలో నా అభిమానులు ఎవరూ క్రియాశీలకంగా పాల్గొనవద్దు. అటువంటి వారిని నా అభిమాన సంఘాల నుంచి తొలగిస్తాను. నాకు రాజకీయాల్లోకి రావాలనే ఉద్దేశం లేదు‘ అని సంచలన ప్రకటన చేశారు. దీంతో వీరిద్దరి మధ్య వచ్చిన భేదాభిప్రాయాలు ఏ పరిణామాలకు దారి తీస్తాయోననే చర్చ మొదలైంది.