‘రొటీన్ కు భిన్నంగా ఈ సినిమా తీస్తున్నాం.. ఇప్పటివరకూ వచ్చిన సినిమాలకు భిన్నంగా కొత్త కాన్సెప్ట్ తో తెరకెక్కుతోంది.. ఇటువంటి కథ ముందెప్పుడూ రాలేదు’.. అంటూ పరిశ్రమలో మాటలు వినిపిస్తాయి. ప్రతి సినిమాను కొత్తగా తెరకెక్కించాలని భావిస్తారు దర్శకులు. అయితే.. కొన్ని సినిమాలు మాత్రమే ఆ తరహా మ్యాజిక్ చేస్తాయి. ఏకంగా పరిశ్రమ గమనాన్నే మర్చే శక్తి వాటికి ఉంటుంది. అటువంటి సినిమాల్లో టాప్ ప్లేస్ లో నిలిచే సినిమా ‘శివ’. 1989 అక్టోవర్ 5న విడుదలైన ఈ సినిమా నేటితో 31 ఏళ్లు పూర్తి చేసుకుంది. సినిమాలు రికార్డులతో చరిత్ర సృష్టిస్తాయి.. కానీ ఈ సినిమాకే ఓ చరిత్ర ఉంది.
తెలుగు సినిమా పురుడు పోసుకున్నప్పటి నుంచీ రకరకాలుగా ఎదిగింది. ఈస్ట్ మన్ కలర్, సినిమా స్కోప్, యాక్షన్, ఫైట్స్, 70ఎమ్ఎమ్ సౌండ్.. ఇలా మారుతూ వచ్చింది. అయితే.. సినిమా మేకింగ్ లో మాత్రం మార్పు రాలేదు. ఆ లోటును తీర్చింది ‘శివ’. ఎవరూ ఊహించని విధంగా హాలీవుడ్ మేకింగ్, కెమెరా యాంగిల్స్, స్టడీ కామ్, స్లో డైలాగ్స్, నేరో మ్యూజిక్, ఫైట్స్.. ఇలా ప్రతి విభాగంలో కొత్తగా కనిపించింది శివ. దీనికి తోడు కాంటెంపరరీ కాలేజీ బ్యాక్ గ్రౌండ్, స్టూడెంట్ పాలిటిక్స్, రౌడీయిజం.. ప్రేక్షకులకు చాలా కొత్తగా అనిపించాయి. శివ సృష్టించిన సంచలనం కంటే.. మేకింగే లో మార్పే ప్రత్యేకంగా నిలిచిపోయింది.
ఇన్నేళ్లయినా సినిమా మేకింగ్ గురించి ప్రస్తావన వస్తే ‘శివ’ సినిమా మాత్రమే గుర్తొస్తుందంటే ఈ సినిమా చేసిన మ్యాజిక్ లెవల్స్ ఏంటో అర్ధం చేసుకోవచ్చు. ఇన్ని అద్భుతాలు చేసింది ఏ దిగ్దర్శుకుడు అనుకుంటే పొరపాటే. దర్శకత్వంలో పూర్తిగా మెళకువలు తెలియని ఓ కుర్రాడు.. ఇంతటి అద్భుతాన్ని ఆవిష్కరించాడు. అతనే రామ్ గోపాల్ వర్మ. తొలి సినిమాతోనే సంచలనాలు రేపాడు. దేశం మొత్తం శివ వైపు చూసిందంటే అతిశయోక్తి కాదు. యూత్, కాలేజీ కుర్రకారు పిచ్చెక్కిపోయారు. సైకిల్ చైన్ ఫైట్ సినిమాకే హైలైట్. నాగార్జున స్టార్ హీరో అయిపోయాడు. కొత్త కుర్రాడ్ని నమ్మి నాగార్జున ఈ ప్రాజెక్టుకు ఓకే చేయడం ఓ సంచలనం.